सामाजिक सञ्जाल बन्द गर्ने निर्णय, कुनै पनि हालतमा स्वीकार्य छैन्ः विवेकशील साझा

काठमाण्डौँ । सामाजिक सञ्जाल बन्द गर्ने सरकारको निर्णंय प्रति विवेकशील साझा पार्टीले सुझाब सहितको आक्रोषपूर्ण विज्ञप्ती जारी गरेको छ ।

दैनिक जीवनको अभिन्न अंगकै रुपमा अभ्यासमा आईरहेको कतिपय सामाजिक सञ्जालहरुलाई बन्द गर्ने भनी नेपाल सरकारले गरेको निर्णयप्रति विवेकशील साझा पार्टीको गम्भीर ध्यानाकर्षण भएको  र नागरिकको अभिब्यक्ति स्वतन्त्रताको अंग बन्दै गईरहेको सामाजिक सञ्जाल प्लेटफर्म बन्द गर्ने निर्णयले प्रयोगकर्ताहरुमा मात्र होईन सिंगो लोकतान्त्रिक शासन व्यवस्थाको मर्म, कानुनी ब्यवस्था र मानव अधिकारको मूल्यमान्यता विपरीत भएको विवेकशील साझा पार्टीको ठम्याई रहेको पार्टीका प्रवक्ता आशुतोष प्रधानले जारी गरेको विज्ञप्तीमा उल्लेख गरिएको छ ।

जुन सुकै सेवाप्रदायक संस्थालाई सेवा सञ्चालन गर्नुपूर्व नै कानूनी रुपमा दर्ता गराउने, सूचीकृत गर्ने वा नियमन गर्ने गराउने दायित्व, कर्तव्य र अधिकार सरकारको रहनेमा दुई मत छैन । तर नियमन र व्यवस्थित गर्ने सवाललाई अगाडि नबढाई लामो समयदेखि सञ्चालनमा रहेका सरकारकै कतिपय निकायमा दर्ता, सूचिकरण भएका र आमनागरिकको अभिव्यक्ति र सञ्चारको जीवनशैली नै बनिसकेको सामाजिक सञ्जालहरु नियन्त्रण गर्दै, बन्द नै गर्ने निर्णय कुनै पनि हालतमा स्वीकार्य हुन नस्कने विवेकशील साझा पार्टी विज्ञप्ती मार्फत आफ्नो धारणा व्यक्त गरेको छ ।

त्यस्तै, सरकारको यो कार्य नेपालको संविधानले व्यवस्था गरेको सञ्चारको हक (धारा १९), अभिव्यक्ति स्वतन्त्रताको हक (धारा १७) , सूचनाको हक (धारा २७) जस्ता मौलिक हकहरुलाई सङ्कुचन गर्ने नियत र मानव अधिकारको विश्वव्यापी घोषणापत्र, १९४८ को धारा १९ र नागरिक तथा राजनीतिक अधिकार सम्बन्धी अन्तर्राष्ट्रिय प्रतिज्ञापत्र, १९६६ को धारा १९ मा उल्लेख गरिएको अभिव्यक्ति स्वतन्त्रताको अधिकारको प्रतिकूल समेत हुन जाने विवेकशील साझा पार्टीले आफ्नो विज्ञप्तीमा उल्लेख गरेको छ ।

त्यस्तै पार्टीले विज्ञप्ती जारी गर्दै सञ्जाल बन्द गर्न भनि सरकारले गरेको निर्णयलाई अविलम्ब फिर्ता लिई सामाजिक सञ्जालहरु नियमन र व्यवस्थापनका लागि स्वतन्त्रता मैत्री विशेष उपाय अवलम्बन गर्न समेत सरकार संग आग्रह गरेको छ ।