प्रतिबन्धित फेसबुकमा जेन जी अभियानमाथि महेश बस्नेतको कटाक्ष

काठमाडौँ । एमाले नेता महेश बस्नेतले जेन जीका नाममा टिकटक लगायतका प्लेटफर्ममा भइरहेको अभियानप्रति आपत्ति जनाएका छन् ।  फेसबुुकमा एक प्रतिक्रिया लेख्दै केहीबेर अघि नेता बस्नेतले आफ्नो छोरीको विवाह र छोरी ज्वाईंकाबारे गरिएको प्रचार गलत भएको दाबी गरे ।

छोरीको पवित्र विवाहलाई गलत ढंगले प्रचार गरेर मानसिक तनाव र यातना दिएको भन्दै उनले जेन जी पुुस्ताको नाममा रचनात्मक नभई अपराधिक प्रकृतिको आन्दोलन अपनाईएको आरोप लगाए । 

बस्नेतले भने, ‘यो पुनरुत्थानवादी र अराजकतावादी प्रवृत्तिले सोसल मिडिया तथा पेड मिडियालाई हतियार बनाएर राज्य, त्यसका संयन्त्र, स्थापित दल र नेताहरूमाथि बदनाम अभियान सञ्चालन गर्न थालेको घिनलाग्दो प्रयास असफल भएपछि तिनै तत्वहरूले आफ्नो असफलता ढाकछोप गर्न र गलत लोकप्रियता कमाउन यसलाई अफवाहका रूपमा प्रयोग गरिरहेका छन् । यसै सन्दर्भमा मेरो छोरीको विवाहजस्तो पवित्र पारिवारिक अवसरलाई समेत इष्र्या र द्वेषका आधारमा टिकटकमार्फत तोडमोड गरी गलत प्रचार गरिएकोप्रति म गम्भीर आपत्ति प्रकट गर्दछु । मेरो स्पष्ट चुनौती छ । मेरो छोरी, ज्वाइँ वा मेरो परिवारले नातावाद, कृपावाद वा राज्यका कुनै सेवा–सुविधा अनुचित रूपमा प्रयोग गरेका छैनन् । छ भने पुष्टि गराउन चुनौति दिन्छु । मेरो र मेरो परिवारको  सम्पत्ति तथा जीवनशैली पूर्ण पारदर्शी छ र म गौरवपूर्वक जुनसुकै स्थानमा यसको पुष्टि गर्न सक्छु । मेरो चिकित्सक छोरी र राष्ट्रसेवक ज्वाइँको सामाजिक मर्यादामा आँच आउने, मानसिक यातना दिने र भ्रम फैलाउने यस्ता गतिविधि आपराधिक प्रकृतिका हुन् । साथै रास्वपाका केही विवादित व्यक्तिहरूले आफ्ना व्यक्तिगत झगडा र लफडासम्ममा मेरो नाम जोड्ने प्रयास गरेको समेत देखिन्छ । यस्तो प्रवृत्तिको म कडा भत्र्सना गर्दछु ।