काठमाडौँ । आज नेकपा एमाले निकट युवा संघ नेपाल र दुर्गा प्रसाईँ नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियानले छुट्टाछुट्टै स्थानमा प्रदर्शन गर्दैछन् ।

 युवा संघले तीनकुने र प्रसाईं नेतृत्वको अभियानलाई बल्खुमा कार्यक्रम गर्दै छन् ।

प्रदर्शनमा कुनै अप्रिय घटना घट्न नदिन र दुई समूहबीचको सम्भावित मुठभेड रोक्नका लागि ७ हजार सुरक्षाकर्मी परिचालनको तयारी गरिएको छ । जुलुस आउने बाटो र कार्यक्रम स्थलमा मात्रै मा १ हजार ५८८ सशस्त्र प्रहरी परिचालित हुनेछन् ।

काठमाडौँमा २ हजार ६३७ प्रहरी, ललितपुरमा ५६४ प्रहरी र भक्तपुरमा ४०४ जना प्रहरी परिचालन गर्ने गरी सुरक्षा योजना लागु गरिएको छ । उपत्यका प्रहरी कार्यालयले डीआइजीको नेतृत्वमा ‘कमाण्ड’ सेन्टर बनाएको छ ।

प्रहरीले ड्रोनबाट पनि प्रदर्शन स्थलको सुरक्षा निगरानी गर्ने जनाएको छ ।

दुर्गा प्रसाईँको कार्यक्रममा बल्खु जाने रुट

गणतन्त्रको विरोधी अभियन्ता दुर्गा प्रसाईँको बिहीबार हुने कार्यक्रमको रुट सार्वजनिक गरिएको छ ।

जसमा पूर्वबाट साँगाबाट प्रवेश गरी कोटेश्वर, सातदोबाटो हुँदै बल्खु जाने रुट बनाइएको छ । त्यस्तै, बालाजु क्षेत्रबाट गल्फुपाखा, सोह्रखुट्टे, कालीमाटी हुँदै तोकिएको स्थानमा पुग्ने रुट रहेको छ ।

कति होलान् सहभागी

मेडिकल व्यवसायी दुर्गा प्रसाईंले आजको प्रदर्शनमा सुरुमा ५ लाख समर्थक भेला गर्ने भने पनि २ लाखसम्म हुन सक्ने जनता बचाऊ अभियानका नेताहरुले आकलन गरेका छन् ।

उनिहरुले २ लाख देखि ५ लाखसम्म भने पनि राष्ट्रिय सुरक्षा परिषदले भने प्रसाईंको शक्ति प्रदर्शनमा २० हजार आसपास मान्छे जम्मा हुने अनुमान गरेका छन् । नेपाल प्रहरी, नेपाली सेना, सशस्त्र प्रहरी बल, नेपाल र राष्ट्रिय अनुसन्धान विभाग गरी सबै सुरक्षा संयन्त्रबाट प्राप्त सूचना र विश्लेषणका आधारमा १६ हजार देखि २० हजारसम्म सहभागी हुने परिषदले निष्कर्ष निकालेको हो।

सुरक्षा परिषद्मा सुरक्षा निकायले बुझाएको प्रतिवेदन अनुसार प्रसाईँको आन्दोलनमा सहभागी हुन कोशी प्रदेशबाट ७ हजार, मधेस प्रदेशबाट ६ हजार, बागमती प्रदेशबाट ७ हजार, गण्डकी प्रदेशबाट ३ हजार आउन सक्ने आकलन सुरक्षा परिषदले गरेको छ भने लुम्बिनी, कर्णाली र सुदूरपश्चिमबाट १ हजारको हाराहारी आउन सक्ने विश्लेषण गरेको छ ।