सिधाकुरा र यसका सम्पादकमाथिको धम्की दुखद र खेदजनकः नाफिज

नेपाल आर्थिक पत्रकार संघ (नाफिज) ले समाचार प्रकाशन तथा प्रसारणको विषयमा सिधाकुरा र यसका सम्पादकलाई ज्यान मार्ने धम्की दिएको घटनाप्रति खेद प्रकट गरेको छ ।

बिहीबार एक प्रेस वक्तव्य जारी गर्दै नाफिजले समाचारमा चित्त नबुझे खण्डन तथा उजुरीको विधि रहेको स्मरण गराउँदै सञ्चार माध्यम र पत्रकारमाथि ज्यान मार्ने धम्की दुःखद र खेदजनक भएको नाफिजले भनेको छ ।

नेपाल आर्थिक पत्रकार संघ (नाफिज)का निवर्तमान महासचिव तथा सिधाकुरा डटकमका कार्यकारी सम्पादक नवीन ढुंगानामाथि समाचार लेखेकै भरमा अपरिचित व्यक्तिहरुमार्फत ज्यान मार्ने र कार्यालयमा आगो लगाउन धम्की दिएकोप्रति यस संघको गम्भिर ध्यानाकर्षण भएको छ नाफिजका महासचिव निकेश खत्रीद्वारा जारी विज्ञप्तिमा भनिएको छ, प्रकाशित समाचारप्रति चित्त नबुझेमा खण्डन तथा उजुरी गर्ने विधि विपरित पत्रकारमाथि जाई लाग्नु अत्यन्तै दुःखद र खेदजनक कार्य हो ।

नाफिज यस घटनाको सत्यतथ्य छानबिन गरी दोषीमाथि कारवाही गर्नुका साथै स्वतन्त्र प्रेसको अधिकार सुरक्षित गर्न सम्बन्धित पक्षसँग आग्रह गर्दछ ।

आर्थिक पत्रकारहरूको छाता संस्था नाफिजले उक्त घटनाप्रति यथाशक्य छिटो सत्यतथ्य छानबिन गरी दोषीमाथि कारबाही गर्न पनि सरकारसँग माग गरेको छ । 

जेन्जी आन्दोलनका दौरान आगलागी र तोडफोड गरिएको नेपाली कांग्रेसका सभापति एवं पूर्व प्रधानमन्त्री शेरबहादुर देउवाको बुढानीलकण्ठ स्थित निवासमा जलेको अवस्थामा भेटिएका नेपाली रुपैयाँ तथा अमेरिकी डलरसँग सम्बन्धित दुईवटा समाचार सिधा कुराले प्रकाशित गरेको थियो ।