नेपाल-भारत पारवहन सन्धि प्रोटोकल संशोधन, समुन्द्रसम्मको व्यापारमा लागत र समय बचत हुने

काठमाडौँ । नेपाल भारत पारवहन सन्धि प्रोटोकल संशोधन भएको छ । भारत भ्रमणमा रहेका उद्योग वाणिज्य तथा आपूर्ति मन्त्री अनिल सिन्हाको प्रतिनिधि मण्डल र भारतीय समकक्षी पीयूष गोयल बीचको बैठकले प्रोटोकल संशोधन गरेको हो । 

Watch On

बिहीबार भएको उक्त सम्झौताबाट भारतको कलकत्ता र बिशाखापटनम हुँदै नेपालका नाकासम्म रेल मार्फत हुने कार्गो ढुवानीको कोटा प्रणाली खारेज भएको छ ।

प्रोटोकलमा भएको यस्तो संशोधनबाट भारतको स्थलमार्ग भएर समुन्द्री पहुँचसम्म नेपालले गर्ने व्यापारको लागत घट्ने छ । जसबाट नेपाली व्यवसायीलाई आफ्नो व्यापार वृद्धिमा समय र लागत दुवै कम पर्ने र लाभ बढ्नेछ । 

विद्यामान व्यवस्थाअनुसार भारतको कलकत्ता र विशाखापटनमबाट नेपालको विराटनगर (जोगवनी) र कलकत्ता र विशाखापटनमबाट नौतनवा (सुनाैली ) सम्म र त्यहाँबाट स्थलमार्ग हुँदै भैरहवासम्म हुने कार्गो ढुवानीमा चार वटा ब्लक कार्गो मात्रै ढुवानी गर्न पाइने व्यवस्था थियो । 

तर, प्रोटोकलमा भएको नयाँ संशोधन पछि यो व्यवस्था हटेको छ र अब व्यवसायीले सबै किसिमको कार्गो ढुवानी गर्न वाधा नपर्ने व्यवस्था गरिएको उद्योग मन्त्रालयका सहसचिव जितेन्द्र बस्नेतले जानकारी दिए । 

साथै भेटमा दुई देश बीचको व्यापार सहजिकरणका लागि ब्युरो अफ इन्डियन स्ट्यान्डर्ड (बीआईएस) प्रमाणीकरण प्रक्रिया सहज बनाउने विषयमा समेत छलफलमा रहेका विषयलाई निष्कर्षमा पु¥याउने समझदारी भएको उद्योग, वाणिज्य तथा आपूर्ति मन्त्रालयले जनाएको छ ।