देशलाई चुनौतीबाट निकाल्न निर्वाचन नै वैधानिक उपाय होः संयोजक प्रचण्ड

काठमाडौँ । नेपाली कम्युनिस्ट पार्टीका शीर्ष नेताहरुले मुलुकको अखण्डता, सार्वभौमिकता र संविधान रक्षा सबै राजनीतिक शक्तिको साझा जिम्मेवारी भएको बताएका छन् ।

Watch On

सोमबार विराटनगरमा आयोजना गरिएको एकतासन्देशसभामा उनीहरुले अहिले मुलुकमा संकटमा रहेकाले मुलुकको अखण्डता, सार्वभौमिकता र संविधान रक्षा सबै राजनीतिक शक्तिको साझा जिम्मेवारी भएको बताएका हुन् । कार्यक्रममा नेपाली कम्युनिस्ट पार्टीका संयोजक पुष्पकमल दाहाल प्रचण्डले मुलुक गम्भीर राजनीतिक मोडमा रहेको उल्लेख गर्दै वामपन्थी मात्र नभइ लोकतान्त्रिक शक्तिहरु पनि एकजुट भएर अघि बढ्नुको विकल्प नरहेको बताए ।

उनले जेनजी आन्दोलनको दोस्रो दिनका घटनाले मुलुकको अस्तित्व नै संकटमा पर्न सक्ने अवस्था देखाएको उल्लेख गरे । देशलाई चुनौतीबाट निकाल्न निर्वाचन नै वैधानिक उपाय भएको भन्दै उनले राजनीतिक समाधानको बाटो जनमतबाटै सम्भव हुने स्पष्ट पारे । त्यस्तै नेपाली कम्युनिस्ट पार्टीका सह–संयोजक माधव कुमार नेपालले संविधानको रक्षा सबै दलको साझा कर्तव्य रहेको बताउँदै राजनीतिक स्थिरता र लोकतान्त्रिक प्रक्रियाको निरन्तरताका लागि निर्वाचनको विकल्प खोज्नु नहुने बताए ।

उनले मुलुकमा देखिएको बेतिथी अन्त्य गर्न एकताबद्ध हुनुपर्ने धारणा व्यक्त गरेका थिए । त्यस्तै नेपाली कम्युनिस्ट पार्टीका बरिष्ठ नेता झलनाथ खनालले आर्थिक परिवर्तनका लागि कृषि क्रान्ति र औद्योगिकीकरणलाई अनिवार्य ठहर गर्दै क्रान्तिकारी भूमिसुधार नवगठित पार्टी प्रमुख एजेण्डा रहेको बताए ।

कार्यक्रममा पार्टीका अन्य नेताहरुले राजनीतिक अवस्था, राष्ट्रिय हित र आगामी रणनीतिका विषयमा धारणा राख्दै एकताबद्ध रुपमा अघि बढ्ने प्रतिवद्धता व्यक्त गरेका थिए ।