प्रतिनिधसभा उम्मेदवारका लागि आवेदन दिन रास्वपाको आह्वान

काठमाडौँ । राष्ट्रिय स्वतन्त्र पार्टी(रास्वपा)ले आगामी फागुन २१ गते हुन लागेको प्रतिनिधि सभा निर्वाचनमा पार्टीका तर्फबाट उम्मेदवार हुन चाहाने इच्छुक सदस्यका लागि आवेदन आह्वान गरेको छ ।

Watch On

रास्वपाले संघीय निर्वाचन अन्तर्गतको पहिलो हुने निर्वाचित हुने निर्वाचन प्रणाली (एफपीटिपी) का लागि पार्टीको आन्तरिक उम्मेदवार छनौट प्रक्रियामा सहभागी हुन इच्छुक योग्यता पुगेका पार्टी सदस्यहरुलाई  उम्मेदवार छनोट रूपरेखा बमोजिम मङ्सिर २१ गतेदेखि उम्मेदवारी आवेदन खुला गरेको हो ।

जसमा आवेदन दिनका लागि राष्ट्रिय स्वतन्त्र पार्टीको आधिकारिक मोबाइल एप मार्फत् तोकिएको आवेदन शुल्क बुझाएर आवेदन दिन सकिने रास्वपाले जनाएको छ । रास्वपाले प्रतिनिधि सभा सदस्य उम्मेदवारका हकमा २५ हजार रुपैयाँ आवेदन शुल्क निर्धारण गरेको छ ।

तर विपन्न वर्गका आवेदनकर्ताका हकमा भने योग्यता पुगेका इच्छुक पार्टी सदस्यहरुले आर्थिक अभावका कारण आवेदन शुल्क तिर्न नसक्ने अवस्था भएमा आफ्नो आवेदनसाथ सम्बन्धित सरकारी निकायले जारी गरेको विपन्नताको परिचयपत्र र सम्बन्धित पार्टी पालिका समितिबाट जारी सिफारिस पत्र सहित कागजातहरू अनिवार्य रूपमा पार्टी केन्द्रीय कार्यालय वा इमेलमार्फत् उम्मेदवार छनोट समितिमा पेश गर्नुपर्ने छ ।

यसरी पठाएका उपलब्ध कागजातहरूको आधारमा आवेदन शुल्क मिनाहा गर्ने वा नगर्ने सम्बन्धमा अन्तिम निर्णय पार्टी केन्द्रीय सचिवालयले गर्ने रास्वपाको जनाएको छ । उम्मेदवारी आवेदन तथा उम्मेदवार छनोट प्रक्रियासम्बन्धी थप जानकारी पार्टीको वेवसाइट(https://rspnepal.org/)आवेदन दिन लिंक( https://rspnepal.page.link/app) र पार्टीको केन्द्रीय निर्वाचन आयोग, समग्र पार्टी संरचना (केन्द्र, प्रदेश, जिल्ला, पालिका आदि) बाट लिन सकिने रास्वपाको उम्मेदवार छनोट समितिका संयोजक विपिन कुमार आचार्य जानकारी दिए ।