सभापतिको कार्यभार सम्हाल्दै रविले सम्झिए डिपीको त्यो प्रस्तावः ‘जेलको कार्यवाहक दिन मिल्दैन ?’

काठमाडौँ । राष्ट्रिय स्वतन्त्र पार्टीका सभापति रवि लामिछानेले सभापतिको कार्यभार सम्हालेपछि केन्द्रीय कमिटीको बैठक बसेको छ । आज अपरान्ह ४ बजे पार्टी सभापति रवि लामिछानेको सभापतित्वमा बैठक बसेको हो । 

Watch On

सो क्रममा सभापति लामिछानेको अनुपस्थितिमा कार्यवाहक सभापति डिपी अर्यालले पार्टीलाई संगठित र अनुशासित रुपमा सम्हालेकोमा उनको नेतृत्व क्षमाताको प्रशंसा गर्दै उनीप्रति कृतज्ञता व्यक्त गरे। लामिछानेले पार्टीका विभिन्न तह तप्कामा रही आफ्नो जिम्मेवारी पूरा गरेकोमा सबैप्रति आभार व्यक्त गरे र धन्यवाद ज्ञापन गरे । 

‘हामी अहिले उत्साहित हुन सक्छौँ तर उत्सव मनाउने बेला होइन । अझै धेरै सङ्घर्ष बाँकी छ र धेरै जिम्मेवारी बाँकी छ ।’ लामिछानेले भने । उनले पार्टीको विभिन्न जिम्मेवारीमा रहेका सबैलाई संयमित र अनुशासित हुन अनुरोध गरे । 

उनले भावुक भएर एउटा प्रसङ्गको चर्चा गरे । एकपटक पार्टी कार्यवाहक सभापति डीपी अर्यालउनलाई भेट्न नख्खु कारागार पुगेका थिए । सो क्रममा अर्यालले उनलाई भनेको कुरा जस्ताको तस्तै बताए । अर्यालले सो दिन रविलाई भनेका थिए, ‘पार्टीको नेतृत्व कार्यवाहक दिएको जस्तै कारागारको बसाई पनि कार्यवाहकलाई दिन मिल्दैन ? मिल्छ भने तपाईंको भागमा म भित्र बस्न तयार छु। देशलाई अहिले तपाईंको खाँचो छ। तपाईं बाहिर जानुस् ।’