फागुन २१ को निर्वाचनमा उम्मेदवारीका लागि नेकपा उदयपुरबाट १८ जनाको नाम सिफारिस

उदयपुर । नेपाली कम्युनिस्ट पार्टी (नेकपा) उदयपुरले आगामी फागुन २१ गते हुने प्रतिनिधिसभा निर्वाचनलाई लक्षित गर्दै प्रत्यक्ष निर्वाचन प्रणालीतर्फ जिल्लाबाट १८ जनाको नाम सिफारिस गरेको छ।

Watch On

पार्टीको उम्मेदवार सिफारिस कार्यदलले जिल्लाका दुवै प्रतिनिधिसभा निर्वाचन क्षेत्रका लागि उम्मेदवारहरूको नाम केन्द्रमा पठाउने निर्णय गरेको हो । कार्यदलका सदस्य द्रोण प्रसाद पौडेल निरजका अनुसार निर्वाचन क्षेत्र नम्बर १ बाट १० जना र निर्वाचन क्षेत्र नम्बर २ बाट ८ जनाको नाम वर्णानुक्रमअनुसार सिफारिस गरिएको छ।

निर्वाचन क्षेत्र नं. १ बाट सिफारिस हुनेमा अर्जुन तिल्सिना, किरण राई, जगनाथ खतिवडा, प्रवेश खड्का, बलदेव चौधरी, विशाल राई, मणि खम्बू किराँती, मनकुमार राई, रमण भट्टराई र सुरेशकुमार राई छन्। यता निर्वाचन क्षेत्र नं. २ बाट एविराज राई, जगनाथ खतिवडा, बलदेव चौधरी, भेषकुमारी राउत, मेजरकुमार राई, लक्ष्मण पौडेल, सुरेशकुमार राई र हेमराज दाहालको नाम सिफारिस गरिएको छ।

पार्टीका अनुसार जगनाथ खतिवडा, सुरेशकुमार राई र बलदेव चौधरीलाई दुवै निर्वाचन क्षेत्रबाट सिफारिस गरिएको छ। नेकपा उदयपुरले उम्मेदवार सिफारिस प्रक्रियामा समावेशिता, संगठन सुदृढीकरण र जनसमर्थनलाई मुख्य आधार बनाएको कार्यदल सदस्य पौडेलको दाबी  छ। सिफारिस गरिएका नाममध्येबाट अन्तिम उम्मेदवार पार्टी केन्द्रीय समितिको निर्णयपछि टुंगो लाग्ने बताइएको छ।