जापानका लागि राजदूत सिफारिस भएका जिज्ञान कुमार थापाले फिर्ता लिए नाम

काठमाडौँ । जापानका लागि नेपाली राजदूतमा सिफारिस भएका जिज्ञान कुमार थापाले आफ्नो नाम फिर्ता लिएका छन् । संसदीय सुनुवाइ समितिमा थापाले सोमबार नाम फिर्ता लिने निर्णय गरेका हुन् ।

Watch On

थापाले संसदीय सुनुवाइ समितिका सभापतिलाई सम्बोधन गर्दै पत्र पठाएर जापानका लागि नेपालको राजदूत पदको जारी सुनुवाइ प्रक्रियाबाट सम्मानपूर्वक आफ्नो नाम फिर्ता लिएको जानकारी गराएका छन् ।

नेपाल सरकार मन्त्रिपरिषद्को निर्णयअनुसार जापानका लागि राजदूतमा सिफारिस भएका थापाको संसदीय सुनुवाइ प्रक्रिया अघि बढेको थियो । तर, जापानसँग जोडिएका स्वार्थ बाझिन सक्ने (कन्फ्लिक्ट अफ इन्ट्रेस्ट) विषयमा थप अध्ययन र स्पष्टता आवश्यक रहेको भन्दै समितिमा उनको सुनुवाइ प्रक्रिया होल्ड गरिएको थियो । 

थापाले लोकतान्त्रिक मूल्य–मान्यता, सुशासन, संसदीय गरिमा तथा नेपाल सरकारको मर्म र भावनालाई उच्च कदर गर्दै नाम फिर्ता लिने निर्णय गरेको बताएका छन् । ‘कुनै पनि पदभन्दा राष्ट्रिय हित, नैतिक निष्ठा र पारदर्शिता माथि हुन्छ भन्ने मेरो दृढ विश्वास रहेको छ,’ उनले पत्रमा भनेका छन् ।

उनले देश र जनताको सेवाका लागि पद नै अन्तिम माध्यम नभएको उल्लेख गर्दै आगामी दिनमा नेपाल सरकारले सुम्पिने जुनसुकै जिम्मेवारी पनि निष्ठापूर्वक बहन गर्न तयार रहेको बताएका छन् ।

आफ्नो नाम राजदूत पदमा सिफारिस गरेकोमा नेपाल सरकारप्रति आभार व्यक्त गर्दै उनले संसदीय सुनुवाइ प्रक्रियाका क्रममा सहयोग गर्ने समितिका सभापति तथा सदस्यहरूलाई पनि धन्यवाद दिएका छन् ।