सबै कुरा

सूर्तिजन्य पदार्थकोे नियन्त्रणका लागि पोसाक र सादा पोसाकका नगरप्रहरी परिचालन गर्ने महानगरको तयारी

सिधाकुरा

बुधबार, मंसिर २७, २०८०

सूर्तिजन्य पदार्थकोे नियन्त्रणका लागि पोसाक र सादा पोसाकका नगरप्रहरी परिचालन गर्ने महानगरको तयारी

काठमाडौँं : काठमाडौँं महानगरपालिकाले महानगरभित्र सूर्तिजन्य पदार्थकोे नियन्त्रणका लागि बिभिन्न चार क्षेत्रमा १० जनाका दरले नगरप्रहरी परिचालन गर्ने बताएको छ ।

महानगरको उक्त निर्णयको अनुगमनका लागि पहिलो चरणमा ५० जना नगर प्रहरी परिचालन गरिने साथै सादा पोसाकमा समेत नगर प्रहरी परिचालन गरिने महानगरले बताएको छ ।

महानगरले बुधबार पत्रकार सम्मेलन गर्दै मंसिर २८ गते बिहीबारबाट सुर्तीजन्य पदार्थको बिक्री वितरणमा पूर्ण रुपमा प्रतिवन्ध लगाएको जनाएको हो । उक्त प्रतिबन्ध कार्यान्वयन गराउँन महानगरले नगरका विभिन्न ४ क्षेत्रमा १० जनाका दरले महानगर प्रहरी परिचालन गर्ने बताएको छ ।

सूर्तिजन्य पदार्थकोे नियन्त्रणका लागि पसलमा नियमित अनुगमन गर्ने र सुर्तिजन्य पदार्थ बिक्री गरेको पाइएमा दुई पटकसम्म जफत गरिने र तेस्रो पटकमा पसल बन्द गरिने महानगरले जनाएको छ ।

त्यस्तै सार्वजनिक स्थलबाट धुम्रपान गरे त्यहाँबाट निकालिने र एक सय रुपैयाँसम्म जरिवाना तोकेको महानगरका प्रवक्ता नवीन मानन्धरले बताए ।

महानगरले काठमाडौँ महानगरपालिका जनस्वास्थ्य ऐन २०८० को दफा ४२ र सूर्तिजन्य पदार्थ (निरुपण र नियमन) ऐन २०६८ को दफा ११ अनुसार सूर्तिजन्य पदार्थकोे नियन्त्रण गर्न खोजिएको प्रवक्ता नवीन मानन्धरले जानकारी दिए ।

प्रकाशित मिति: बुधबार, मंसिर २७, २०८०

प्रतिक्रिया दिनुहोस्