रबिना खानको 'प्रेसर कुकर': राज्य र पार्टीले गरेको अन्यायविरुद्ध पालैपालो

कपिलवस्तु। सिधाकुराको ग्राउण्ड जिरो रिपोर्टिङ टिम कपिलवस्तुको मायादेवी गाउँपालिकास्थित पकडीबजार पुग्दा भेटिइन्– रबिना खान, जो स्वतन्त्र उम्मेदवारका रुपमा प्रेसर कुकरमा स्थानीयहरुसँग भोट माग्दै थिइन्।

३३ वर्षीया रबिनालाई केही साथीहरुले सघाइरहेका थिए। साथीहरुभन्दा अगाडि सरेर रबिनाले स्थानीयसँग भोट माग्थिन्– म पार्टीको होइन, स्वतन्त्र, महिला र जनताको उम्मेदवार।

Watch On

उनले भोट मागिरहेको दृष्य सिधाकुराको क्यामेराले रेकर्ड गरिरहेको थियो । बेला बेलामा हामीसँग कुरा गर्थिन्, कोही देख्यो कि आफ्नो चुनाव चिन्ह अंकित पर्चा देखाउँदै भोट माग्न पुगिहाल्थिन्। रबिनाले जुन उत्साहले भोट मागिरहेकी छन्, उनीभित्र भने उत्साहभन्दा पनि निराशाको राँको थियो।

खासमा रबिना माओवादीकी पूर्वलडाकु हुन्। राज्यले जनतामाथि अन्याय गर्यो भनेर सशस्त्र संघर्ष गरिरहँदा १० वर्षको उमेरमै उनी माओवादीमा लागिन्, युद्ध लडिन्। सशस्त्र युद्धका क्रममा उनले बन्दुक बोकिन्, प्रेसर कुकरलाई बम बनाएर पड्काइन्। कपिलवस्तु– १ मा स्वतन्त्र उम्मेदवार बनेकी रबिनाले चुनाव चिन्ह पाएकी छन् प्रेसर कुकर ।

रबिना र प्रेसर कुकरबीचको संयोग पनि गज्जबको छ। पहिले राज्यले गरेको अन्यायविरुद्ध प्रेसर कुकर बोकिन्, अहिले पार्टीले गरेको अन्यायविरुद्ध प्रेसर कुकर नै बोक्दैछिन्।

बाल्यकालमै रबिनाले युद्ध लडिन्, परिवार त्यागिन् । अहिले उनीसँग न परिवार छ, न पार्टी । उनले युद्ध लडेको माओवादी अहिले माओवादी छैन, नेकपा भएको छ। पार्टी फेरियो, पार्टीका नेताहरुको मन पनि फेरियो।

नेकपाले पहिले रबिनालाई समानुपातिकतर्फ मुस्लिम महिला उम्मेदवारको सूचीमा पहिलो नम्बरमा राखेको थियो। तर, निर्वाचन आयोगमा सूची संशोधन गर्दा उनको नाम झिकिदियो, अरुलाई नै राखिदियो। २०५८ सालमा राज्यविरुद्ध विद्रोह गरेकी रबिनाले २०८२ सालमा पार्टीभित्रै विद्रोह गरिन्, स्वतन्त्र उम्मेदवारी दर्ता गराइन्।

पार्टीका लागि घरपरिवार त्यागेँ– रबिनाले सिधाकुरासँग भनिन्– अहिले त पार्टीले नै संघर्ष गरेका हामीजस्ता कार्यकर्तालाई त्याग्यो।

सिधाकुराले ‘विद्रोही’ रबिनासँग लामो कुरा गरेको छ। उनीसँगको विस्तृत कुराकानी सिधाकुराको युट्युब च्यानलमा हेर्न सक्नु हुनेछ।