समाज

कटारीमा हावाहुन्डरीका कारण २ जनाको मृत्यु, ५ जना घाइते

अभिमन्यु लामिछाने

सोमबार, चैत २, २०८२

कटारीमा हावाहुन्डरीका कारण २ जनाको मृत्यु, ५ जना घाइते

उदयपुर । आइतबार साँझ आएको हावाहुन्डरीका कारण उदयपुरको कटारीमा २ जनाको मृत्यु भएको छ भने ५ जना घाइते भएका छन्।

मृत्यु हुनेमा कटारी नगरपालिका–८ थलीयाटारकी मिनामाया तामाङ र कटारी नगरपालिका–५ निवासी ६४ वर्षीय वीरेन्द्र चौधरी रहेका छन्।

Watch On

इलाका प्रहरी कार्यालय कटारीका अनुसार कटारी–५ स्थित राधा कृष्ण मन्दिर नजिक रहेको खाजा घरमा हावाहुन्डरीका कारण रुख ढलेर चौधरीको मृत्यु भएको हो । सोही घटनामा रुखले थिचेर ५ जना घाइते भएका थिए।

घटनामा घाइते भएकी ४ वर्षीया बालिका विनिशा चौधरीलाई नेपाल प्रहरी, सशस्त्र प्रहरी तथा स्थानीयवासीको सहयोगमा करिब ४० मिनेटपछि उद्धार गरिएको इलाका प्रहरी कार्यालय कटारीका प्रमुख प्रहरी नायब उपरीक्षक केदारमान दोङले जानकारी दिए।

यस्तै कटारी ८ की मिनामाया तामाङ को कटारी अस्पतालमा उपचारको क्रममा मृत्यु भएको हाे । घरमा खसिबाख्रा सार्ने क्रममा रुखका हाँगा भाँचिएर लाग्दा उनी घाइते भएकी थिइन् । अस्पतालमा उपचारकाे क्रममा उनकाे मृत्यु भएको प्रहरीले जनाएको छ।

घाइतेहरूको कटारी प्रादेशिक अस्पतालमा उपचार भइरहेको छ भने टाउकोमा चोट लागेका कटारी ५ बलाहा बस्ने ४६ वर्षीय लीला बहादुर दनुवार लाई थप उपचारका लागि विराटनगर पठाइएको प्रहरी नायब उपरीक्षक दोङले बताए।

प्रकाशित मिति: सोमबार, चैत २, २०८२

प्रतिक्रिया दिनुहोस्