पर्सिको बैठकले गगनको राजीनामा अस्वीकृत गर्ने, अर्को बैठकले महाधिवेशन तोक्ने

काठमाडौँ । नेपाली कांग्रेसका सभापति गगनकुमार थापाले पदबाट दिएको राजीनामा स्वीकृत वा अस्वीकृत गर्ने निर्णय आइतबार बस्ने केन्द्रीय समिति बैठकले गर्ने भएको छ । सभापति थापाले दिएको राजीनामा आज बसेको केन्द्रीय समिति बैठकमा उपसभापति विश्वप्रकाश शर्माले पेस गरेका थिए । उक्त राजीनामा सँगै उपसभापति शर्माले सभापति थापाको राजीनामा अस्वीकृत गर्नुपर्ने प्रस्ताव पनि पेश गरेका थिए । शर्माले थापाको राजीनामा अस्वीकृत गर्न ७ तर्क पनि राखेका छन् ।

आजको बैठकमा बोल्ने केन्द्रीय सदस्यहरुले पनि उपसभापति शर्माको तर्कप्रति सहमति जनाउँदै अहिले राजीनामा स्वीकृत नगर्ने बरु छिट्टै नियमित १५औं महाधिवेशनको मिति तोक्नुपर्ने धारणा राखेका थिए । प्रवक्ता देवराज चालिसे पनि केन्द्रीय सदस्यहरुले सभापतिको राजीनामा स्वीकृत गर्न नहुने धारणा राखेको जानकारी दिए ।

Watch On

बैठक आइतबार बिहान ८ बजे बस्ने गरी स्थगित भएको छ । आइतबार बस्ने बैठकमा पनि चुनावको समीक्षा र सभापतिको राजीनामा बारे छलफल हुने उनले जानकारी दिए ।

यसैबीच, कांग्रेस महामन्त्री गुरुराज घिमिरेले केन्द्रीय समितिको अर्को बैठकले १५ औं महाधिवेशनको मिति तोक्ने जानकारी दिए । यो बैठकले चुनावको समीक्षा गर्ने र अर्को बैठकले महाधिवेशनको मिति तोक्ने उनको भनाइ छ । 
गएको मंसिरमै कार्यकाल सकिएपछि कांग्रेसले केन्द्रीय समितिको बैठक पदावधि जेठसम्मका लागि लम्ब्याएको थियो ।

जेनजी आन्दोलनपछि कांग्रेसका करिव ५५ प्रतिशत महाधिवेशन प्रतिनिधिले विशेष महाधिवेशनको माग गर्दै असोज २९ गते केन्द्रीय समितिमा निवेदन दिएका थिए । सोही निवेदनका आधारमा तत्कालीन दुई महामन्त्री गगन थापा र विश्वप्रकाश शर्माले पुस अन्तिम साता विशेष महाधिवेशन आह्वान गरेका थिए । सोही विशेष महाधिवेशनले गगन थापाको सभापतित्वमा नयाँ केन्द्रीय समिति चयन गरेको थियो ।

कांग्रेसमा आगामी जेठभित्रै नियमित महाधिवेशन गर्ने वा मंसिरमा भन्ने छलफल चलिरहेको छ । महामन्त्री घिमिरेले आगामी बैठकमा महाधिवेशनको कार्यतालिका पेश हुने जानकारी दिए ।