अम्बे कोशी बचत तथा ऋण सहकारी संस्थाले २ सय ८७ जनाको बचत फिर्ता गर्दै

काठमाडौँ । कोशी प्रदेशको इटहरीस्थित अम्बे कोशी बचत तथा ऋण सहकारी संस्थाका २० हजार रुपैया सम्म बचत गर्ने बचतकर्ताहरुको रकम फिर्ता गरिने भएको छ ।

कोशी प्रदेशको उद्योग कृषि तथा सहकारी मन्त्रालयले गठन गरेको समस्याग्रस्त सहकारी व्यवस्थापन समितिले करिब १५ महिना गरेको छानबिन पछि २० हजार रुपैया सम्म रकम बचत गरेका २ सय ८७ जना बचतकर्ताहरुलाई करिब २८ लाख ५७ हजार रुपैया फिर्ता दिन लागिएको हो ।

Watch On

समितिले आयोजना गरेको पत्रकार सम्मेलनमा समस्याग्रस्त सहकारी व्यवस्थापन समिति कोशी प्रदेशका सदस्य सचिव पदम बहादुर ठकुराठीले अम्बे कोशी बचत तथा सहकारी संस्थाले करिब २४ करोड ८८ लाख रुपैया बचत फिर्ता गर्नुपर्ने देखिएको जानकारी दिए।

संस्थाको खातामा १ करोड ३८ लाख ४४ हजार रुपैया बैंकमा रहेको पाइएको र सोही रकमबाट बचत फिर्ता गर्न लागिएको उनले बताए। पत्रकार सम्मेलनमा कोशी प्रदेशका उद्योग, कृषि तथा सहकारी मन्त्री इसराइल मन्सुरीले सहकारीका संचालकहरुको जग्गा र सम्पत्ति रोक्का गरिएको र चाडै नै एक लाख सम्म रकम जम्मा गर्ने बचतकर्ताहरुको रकम फिर्ता दिने तयारी रहेको बताए ।

अम्बे कोशी बचत तथा ऋण सहकारी संस्थामा १ हजार १ सय ७३ जना बचतकर्ताहरुले रकम दाबी गरेका थिए । अहिले सम्म समस्याग्रस्त सहकारी व्यवस्थापन समितिमा कोशी प्रदेशका थप दुई वटा सहकारीहरुले समस्याग्रस्त सहकारी घोषणाका लागि आग्रह गरेकोमा दाबी नपुगेको जानकारी दिइएको थियो ।