सिभिल अस्पतालमा कर्मचारीले बेड नपाउने समस्या अन्त्य गर्न सामान्य प्रशासनमन्त्री प्रतिभा रावलको निर्देशन

काठमाडौँ । संघीय मामिला तथा सामान्य प्रशासनमन्त्री प्रतिभा रावलले सिभिल अस्पतालका सेवा गुणस्तरीय र सहज बनाउन निर्देशन दिएकी छन् । कार्यकारी निर्देशक  प्रा. डा. मोहन चन्द्र रेग्मीलाई अस्पतालमा देखिएका समस्याको समाधान गरी निजामती कर्मचारीले सिभिल अस्पतालमा बेड तथा सेवा नपाई फर्किनुपर्ने अवस्थाको अन्त्य गर्न निर्देशन दिएकी हुन् । 

मन्त्री रावलले अस्पतालको सेवा सुधारको लागि विगतमा गरिएका अध्ययन प्रतिवेदन संकलन गरी एक महिनाभित्र, छ महिनाभित्र र एक वर्षभित्र कार्यान्वयन हुने गरी तीन चरणमा विभाजन गरेर सुधार योजना ल्याउन भनेकी छिन् । बिग्रिएका उपकरण तथा मेसिनहरू तत्काल मर्मत गरी सञ्चालनमा ल्याउन तथा अस्पतालमा चाप कम गर्नका लागि आवश्यक कदम चाल्न पनि उनले निर्देशन दिएकी छिन् । 

Watch On

सो क्रममा मन्त्री रावलले निजामती अस्पताललाई निजामती कर्मचारीका लागि डेडिकेटेड अस्पतालका रूपमा विकास गर्ने सरकारको योजना रहेको उल्लेख गरिन् । 

त्यस्तै सिभिल अस्पतालको सेवालाई विकेन्द्रीकरण गर्दै प्रारम्भिक चरणमा कम्तीमा तीन प्रदेशबाट यस्तो सेवा विस्तार गर्नुपर्नेमा उनको जोड थियो । 

उनले अस्पताललाई एकेडेमिक संस्थाका रूपमा विकास गर्ने तथा साइक्लोट्रोन परियोजना, क्यान्सर उपचार विस्तार र बोनम्यारो ट्रान्सप्लान्टलगायतका कार्यक्रमलाई प्राथमिकतामा राखेर अघि बढाउन पनि निर्देशन दिइन्।

अस्पतालको सेवा प्रवाहलाई सहज बनाउन र पूर्वधार विस्तारका लागि सरकारका तर्फबाट गर्नुपर्ने कार्यमा आफू प्रतिवद्ध रहेको पनि बताइन् ।