रास्वपाका सांसदहरु नै धर्ना बसेको सिन्धुलीको घटना के हो ?

सिन्धुली । प्रहरी हिरासतमै २२ वर्षीय श्रीकृष्ण विकको मृत्यु भएपछि न्याय माग्दै सत्तारुढ रास्वपाका ६ सांसद र दलित अधिकारकर्मी जिल्ला प्रशासन कार्यालय, सिन्धुलीको गेटमा धर्नामा बसेका छन् ।

सांसदहरू खगेन्द्र सुनार, रिमा विश्वकर्मा, सुष्मा स्वर्णकार, गणेश विक, खिमा विक, आशिष गजुरेल प्रशासनअघि धर्नामा बसेका हुन् ।

Watch On

अन्तरजातीय बिहेको आरोपमा पक्राउ परेका श्रीकृष्णलाई प्रहरीले हिरासतमा कुटेर हत्या गरेको र घटना दबाउन सीडीओ र एसपीले दबाब दिएको पीडितको आमालाई उद्धृत गर्दै सुनारले फेसबुकमा लेखेका छन् ।

सीडीओ, एसपी र खुर्कोटका इन्स्पेक्टरलाई तत्काल निलम्बन गरी छानबिन गर्नुपर्ने,संसदीय छानबिन समिति गठन गर्नुपर्ने उनीहरूको माग छ ।

घटना के हो ? 

सिन्धुलीको सुनकोशी गाउँपालिका ३ जुम्लेडाँडाका २२ वर्षीय श्रीकृष्ण विकको वैशाख ७ गते इलाका प्रहरी कार्यालय खुर्कोटको हिरासतमै मृत्यु भएको थियो ।

जिल्ला प्रहरी कार्यालय सिन्धुलीका प्रवक्ता डिएसपी सूर्यप्रकाश सुवेदीका अनुसार श्रीकृष्ण हिरासतमै सर्टको पासो लगाएको अवस्थामा अचेत फेला परेका थिए।  उनलाई अस्पताल र्पुयाउँदा चिकित्सकले मृत घोषणा गरिदिएका थिए । 

श्रीकृष्णलाई वैशाख ३ गते ललितपुर  प्रहरीले छलफलका लागि बोलाएर हिरासतमा राखेको थियो । प्रहरीले श्रीकृष्णका विरुद्ध १७ वर्षीया बालिका बलात्कारको कसुरमा मुद्धा दर्ता गरेको थियो । तर श्रीकृष्णका परिवारले भने ती बालिका र उनी प्रेम विवाह गरेको बताउँदै आएका छन् । 

ललितपुर प्रहरीमा दर्ता भएको जाहेरीमा घटनास्थल भने खुर्कोट भएकाले थप अनुसन्धानका लागि भन्दै श्रीकृष्णलाई ४ गते राति नै सिन्धुली पुर्याइएको थियो । 

४ गते जिल्ला प्रहरी कार्यालय सिन्धुलीले  जिल्ला अदालतबाट ५ दिनको म्याद थप गरी थुनामा राखेको थियो।

श्रीकृष्णको परिवारले भने प्रहरीले अन्तरजातीय विवाह गरकै कारण उनलाई बलात्कार मुद्धा लगाइएको र प्रहरी हिरासतमा नियोजित रूपमा कुटपिट गरेर मारेको आरोप लगाएका छन्। 

श्रीकृष्णसँगै ललितपुरमा बस्दै आएका उनका भाइ उमेशका अनुसार ड्राइभर पेसा गर्दै आएका श्रीकृष्ण र उनीहरुको डेरा नजिकै बस्ने खोटाङकी एक किशोरी दुई वर्षदेखि प्रेम सम्बन्धमा थिए । उनीहरु गत चैत २८ गते दुबैको मञ्जुरीमा विवाह गरेको भन्दै सँगै डेरामा बस्न थालेका थिए । 

त्यसको दुई दिनपछि दुबै जना सिन्धुली घर गएका थिए । तर सिन्धुली पुगेपछि ललितपुरको सातदोबाटो प्रहरी वृत्तबाट केटीपक्षले कुरा गर्न खोजेको छ भनेर पटकपटक फोन आएपछि उनीहरू ३ गते फर्किएको उमेश बताउँछन् । 
उमेश र किशोरी साँझ ५ बजे प्रहरी कार्यालय पुगेपछि प्रहरीले सोधपुछ गरेको उमेश बताउँछन् ।  

उनका अनुसार प्रहरीले बालबिवाहको कसुरमा अनुसन्धान गर्ने तयारी गरेपछि किशोरीले आफू खुशीले विहे गरेको बताउँदै किशोर माथि कुनै मुद्दा मामिला नगर्न भनेकी थिइन् । पछि सुरुमा कानुनले तोकेको उमेर पूरा नभएकाले तत्काल लागि छुट्टै बस्ने र २ वर्षपछि विवाह गर्ने सहमती भएको थियो । 

तर पछि किशोरीका आफन्तको दबाबमा प्रहरीले श्रीकृष्णलाई आज छाड्न नमिल्ने, भोली आउनु  भन्दै राति ९ बजे आफू लगायत केटापक्षका आफन्तलाई घर फकाईदिएको उमेश बताउँछन् । भोलीपल्ट ९ बजे प्रहरीमा पुग्दा श्रीकृष्णलाई खुर्काेटमा मुद्धा परेकाले राति नै सिन्धुली पठाइएको प्रहरीले जानकारी गराएको उमेशको भनाई छ ।