ऊर्जा मन्त्रालयको हटलाइनमा आए १० हजार बढी गुनासा, ईभी चार्जिङ नभेटिएको देखि मिटर नपाएकासम्म समस्या

काठमाडौँ । ऊर्जा मन्त्रालयले गुनासो सुन्ने र तुरुन्त सम्बोधन गर्ने कार्यशैलीलाई प्राथमिकतामा राखेको जनाएको छ । 

जनगुनासो सुन्ने मात्र होइन, समाधानसम्म पुर्‍याउने संस्कृतिको खोजीमा रहेको ऊर्जा, जलस्रोत तथा सिँचाइ मन्त्रालयले पछिल्लो समय सेवा प्रवाहमा नयाँ अभ्यास सुरु गरेको ऊर्जा मन्त्री बिराज भक्त श्रेष्ठको सचिवालयले जनाएको छ । 

Watch On

मन्त्री श्रेष्ठको निर्देशनपछि विद्युत् सेवासँग सम्बन्धित हटलाइन नम्बर ११५१ लाई थप प्रभावकारी बनाइएको छ । 

सचिवालयका अनुसार २४सै घण्टा सञ्चालनमा रहने उक्त हटलाइनले  केवल गुनासो टिप्ने माध्यमका रुपमा मात्रै सीमित नरहेर, तत्कालै समस्या समाधानका लागि प्रत्यक्ष संयन्त्रका रूपमा विकास गरिएको छ । 

सेवाग्राहीका फोन, ह्वाट्स एप, इमेलदेखि हेलो सरकारसम्म आएका गुनासोलाई तत्काल सम्बन्धित निकायसँग समन्वय गरी समाधान गर्ने प्रणालीलाई परिणाममुखी बनाइएको छ ।

मन्त्री श्रेष्ठको सचिवालयले यसलाई नियमित प्रशासनिक प्रक्रियाभन्दा उत्तरदायी एवम् जबाफदेही ढङ्गले अघि बढाएको छ । 

मन्त्रालयमा प्राप्त गुनासो सम्बन्धित निकायसम्म पुर्‍याउने मात्र होइन, समाधानको अवस्थामा पुर्‍याउने अभ्यास सचिवालयले थालेको छ ।

मन्त्रालयका अनुसार चैत १५ गते यता मात्रै हटलाइन र अन्य माध्यमबाट १० हजार ३९२ भन्दा बढी गुनासो प्राप्त भएका छन् । 

चैत १५ गते चैत ३० गतेसम्मको अवधिमा फोनमार्फत ४ हजार २४८, ह्वाट्स एपबाट १४, इमेलबाट २ तथा हेलो सरकारमार्फत ५ वटा गुनासो प्राप्त भएका थिए । 

त्यसपछि वैशाख महिनाभर फोनमार्फत ६ हजार २६, ह्वाट्स एपबाट ९२ र इमेलबाट १० वटा उजुरी दर्ता भएका छन् । यसबाहेक लिखित रूपमा आएका दुई सयभन्दा बढी निवेदन तथा सञ्चार माध्यममा प्रकाशित जनसरोकारका विषयलाई समेत सचिवालयले निगरानीमा राख्दै समाधान प्रक्रिया अघि बढाएको जनाएको छ ।

प्राप्त अधिकांश गुनासो विद्युत् सेवासँग सम्बन्धित छन् । विशेष गरी विद्युतीय दुर्घटना, विद्युत् लाइन अवरुद्ध, ट्रान्सफर्मर बिग्रिने, कम भोल्टेज, विद्युत् प्रसारण तथा वितरण लाइन लत्रिने, विद् युतका टावर तथा पोल ढल्ने, पोल स्थानान्तरण गर्नुपर्ने, तारमा आगलागी हुने, मिटर नपाउने, पोल नपाउने, मिटर रिङिडमा समस्या, ईभी चार्जिङमा समस्या, सिँचाइमा समस्या देखि कर्मचारीले घुस मागेको सम्मका गुनासो मन्त्रालयमा आउने गरेका छन् । 

कतिपय घटनामा मन्त्रालयको प्रत्यक्ष सक्रियता देखिएको छ । बाँकेको चिसापानी क्षेत्रमा कोहलपुर–सुर्खेत १३२ केभी प्रसारण लाइन अन्तर्गत दुई वटा टावर ढल्दा कर्णाली प्रदेशको विद्युत् आपूर्ति प्रभावित बनेको घटनामा मन्त्रालयले तत्काल समन्वय गरी सेवा पुन निर्माणमा प्राथमिकतामा दिँदै छानबिनसमेत अघि बढेको छ । त्यसै गरी चट्याङका कारण ट्रान्सफर्मरमा क्षति पुग्दा स्याङ्जाको वालिङ र भीर कोट नगरपालिका क्षेत्रमा अवरुद्ध विद्युत् सेवा करिब ६५ घण्टापछि पुनः सञ्चालनमा ल्याइएको थियो । 

काठमाडौँको स्वयम्भू क्षेत्रमा वर्षौँदेखि सडकको बिच भागमा ठडिएका पोल स्थानान्तरणको विषय पनि मन्त्रालयमा पुगेको जन गुनासोमध्ये एक थियो । स्थानीय तह, विद्युत् प्राधिकरण र सम्बन्धित निकायबिच समन्वय गरी त्यसलाई समाधान भएको सचिवालयले जनाएको छ ।

ऊर्जा मन्त्रालयले पछिल्लो समय अवलम्बन गरेको यो शैलीले ‘सुनुवाइ हुने सरकारको अनुभूति दिलाउने प्रयास गरेको छ । गुनासो दर्ता गरेर महिनौँ कुर्नुपर्ने प्रवृत्तिभन्दा फरक, तत्काल प्रतिक्रिया र प्रत्यक्ष अनुगमनको अभ्यासले सार्वजनिक सेवा प्रवाहमा सुधार तथा सेवाग्राहीमा भरोसा बढाउने अपेक्षा गरिएको छ ।