सप्तकोशीको टापुबाट ४ सय ७५ किलो गाँजा बरामद

उदयपुर । उदयपुर सीमास्थित सप्तकोशी नदी बीचको टापुबाट करिब ५ क्विन्टल गाँजा बरामद भएको छ । सशस्त्र प्रहरीको टोलीले ४७५ किलोग्राम गाँजा बरामद गरेको हो ।

सुनसरीको बराहक्षेत्र नगरपालिका–६ र उदयपुर जिल्लाको बेलका नगरपालिका–८ स्थित सप्तकोशी नदीको बीच टापुमा लुकाइ राखेको १६ बोरा गाँजा बरामद गरिएको सशस्त्र प्रहरीका प्रवक्ता डीआईजी विष्णुप्रसाद भट्टले जानकारी दिए ।

Watch On

बरामद गरिएको वस्तु को नापतौल गर्दा बोरा सहित ४ सय ८० केजी बोरा बाहेक ४ सय ७५ केजी रहेको सशस्त्र प्रहरीले जनाएको छ। 

विशेष सूचनाको आधारमा सशस्त्र प्रहरी बल नेपाल नं ४ गण हेडक्वाटर मातहत, नेपाल विपद् व्यवस्थापन वेश चतराबाट इन्सपेक्टर मेघराज राउतको कमाण्डमा ५ जना र सुरक्षा वेश रामपुरका इन्स्पेक्टर राजविक्रम खड्काको कमाण्डमा ५ जना सहित १० जना  खटिएको टोलीले गाँजा बरामद गरेको हो ।

नदीको बीच टापुमा भएकोले सशस्त्र प्रहरीले रबर  बोटको प्रयोग गरी गाँजा बरामद गरी नदीबाट बाहिर निकालेको थियो । बरामद गाँजा आवश्यक कारबाहीको लागि ईलाका प्रहरी कार्यलय महेन्द्रनगर , चक्रघट्टी सुनसरीमा बुझाइएको सशस्त्र प्रहरीले जनाएको छ।

गत असारमा समेत उदयपुरको कटारी नगरपालिका  ३ स्थित सशस्त्र बेश क्याम्प कटारीमा उनै सशस्त्र प्रहरी निरीक्षक मेघराज राउतकै कमाण्डमा असार ३० गते  ४ सय ३६  किलो अवैध गाँजा बरामद गरेको थियो ।  कटारी बाट सिराहा तर्फ बोलेरोमा लुकाई छिपाई  लाँदै गरेको अवस्थामा को १ ज १२७५ नम्बरको बुलेरो सहित चालक तेज राई पक्राउ परेका थिए।