धुलिखेल–खावा खण्डमा काम सुस्त (तस्बिरहरु)

काभ्रेपलाञ्चोक। अरनिको राजमार्गअन्तर्गत धुलिखेल–खावा सडकखण्डको स्तरोन्नति तथा कालोपत्रे कार्य अन्तिम चरणमा पुगेर  प्रभावित बनेको छ। 

लामो समयदेखि धुलो, हिलो तथा जामको समस्या भोग्दै आएका स्थानीयवासी र यात्रुहरू सडक निर्माण सम्पन्न हुने प्रतीक्षामा रहे पनि केही सातायता निर्माणको गति सुस्त बनेको छ।

Watch On

सडक डिभिजन कार्यालय भक्तपुरका अनुसार धुलिखेल चोकबाट कालोपत्रे कार्य सुरु गरिएको हो। करिब ४ किलोमिटर लम्बाइ रहेको यस सडकखण्डमध्ये पहिलो चरणमा २.५ किलोमिटर सडक कालोपत्रे सम्पन्न भइसकेको छ भने बाँकी १.५ किलोमिटर खण्डमा दोस्रो चरणअन्तर्गत कालोपत्रे गरिनेछ।

यसअघि २०७९ जेठ २० गते २२ महिनाभित्र निर्माण सम्पन्न गर्ने गरी एक निर्माण कम्पनीले ठेक्का पाएको थियो। 

तर निर्धारित समय सकिएको ११ महिनासम्म पनि काम सम्पन्न हुन नसकेपछि २०८१ फागुन २५ गते सडक डिभिजन कार्यालय भक्तपुरले उक्त ठेक्का रद्द गरेको थियो।

त्यसपछि नेपाल सरकारबाट ४२ करोड रुपैयाँ स्रोत सुनिश्चित गरी १४ महिनाभित्र निर्माण सम्पन्न गर्ने लक्ष्यसहित गत साउनमा नयाँ ठेक्का आह्वान गरिएको थियो। 
नयाँ ठेक्का प्राप्त निर्माण कम्पनीले मनसुन सुरु हुनुअघि नै सडकमा पिचको काम सम्पन्न गर्ने लक्ष्य राखेको थियो।

निर्माण कम्पनीका अनुसार ग्राभेलमाथि २० सेन्टिमिटर बाक्लो सिमेन्ट मिश्रित बेस राख्ने तथा त्यसपछि डिबिएम र अस्फाल्टको दुई तहमा कालोपत्रे गरिएको छ । 
हालसम्म सडकको अधिकांश भागमा बेस, सब–बेस तथा पहिलो तहको कालोपत्रे सम्पन्न भइसकेको छ।

धुलिखेल बजार क्षेत्रदेखि खावा आसपाससम्मको मुख्य खण्डमा कालोपत्रे गरिएको छ भने केही स्थानमा अन्तिम तहको कालोपत्रे, सडक किनार व्यवस्थापन, नाली निर्माण तथा लेन मार्किङका काम बाँकी रहेका छन्। 

तर बिटुमिन, क्रसिङ सामग्रीलगायत आवश्यक निर्माण सामग्रीको आपूर्तिमा समस्या देखिएपछि अन्तिम चरणका काम प्रभावित बनेका छन्। निर्माण सामग्री समयमै उपलब्ध हुन नसक्दा केही दिनयता निर्माणस्थलमा उल्लेखनीय गतिविधि देखिएको छैन।

स्थानीयवासीका अनुसार केही महिनाअघि दैनिक रूपमा हेभी उपकरण परिचालन गरी कालोपत्रे र ग्राभेलिङको काम भइरहेको थियो। तर पछिल्लो समय निर्माणस्थलमा उपकरण र कामदारको उपस्थिति समेत घटेको छ। 

यसले सडक छिट्टै सम्पन्न हुने अपेक्षा गरेका स्थानीयवासीलाई निराश बनाएको छ।

धुलिखेल–खावा सडकखण्ड सूर्यविनायक–धुलिखेल सडक विस्तार आयोजनाको महत्वपूर्ण हिस्सा हो। 

काठमाडौं उपत्यकाबाट पूर्वी नेपालतर्फ जाने प्रमुख प्रवेशमार्गका रूपमा रहेको यस सडकको निर्माणमा भएको ढिलाइका कारण यात्रु, व्यवसायी तथा स्थानीयवासीले वर्षौंदेखि सास्ती खेप्दै आएका छन्।

निर्माण पक्षले सामग्री आपूर्तिको समस्या समाधान हुनासाथ बाँकी कामलाई तीव्रता दिइने जनाएको छ। मनसुन सुरु हुनुअघि सकेसम्म कालोपत्रे तथा अन्य संरचनागत काम सम्पन्न गर्ने लक्ष्य रहे पनि हाल देखिएको सामग्री अभावले उक्त लक्ष्य प्रभावित हुन सक्ने देखिएको छ।

यद्यपि अधिकांश भागमा कालोपत्रे सम्पन्न भइसकेकाले विगतको तुलनामा सडकको अवस्था उल्लेखनीय रूपमा सुधारिएको छ। धुलो र हिलोको समस्या केही हदसम्म कम भए पनि बाँकी काम सम्पन्न नहुँदा यात्रुले अझै केही स्थानमा असहज यात्रा गर्नुपरेको अवस्था रहेको छ। स्थानीयवासीले निर्माण सामग्रीको नियमित आपूर्ति सुनिश्चित गर्दै सडकको बाँकी काम शीघ्र सम्पन्न गर्न सम्बन्धित निकायसँग माग गरेका छन्।

तस्बिर : सुर्याम्स उप्रेती / नेपाल फोटो लाइब्रेरी