रास्वपाले १८ वर्षमुनिका बालबालिकालाई पार्टी सदस्य बनाएको भन्दै कांग्रेसले सदनमा उठायो प्रश्न

काठमाडौँ । प्रमुख प्रतिपक्षी नेपाली कांग्रेसले कानुन विपरित रास्वपाले १८ वर्ष मुनिका बालबालिकालाई पार्टी सदस्य बनाएको भन्दै संसदमा प्रश्न उठाएको छ ।

प्रतिनिधि सभाको आइतबार बसेको बैठकमा कांग्रेस सांसद रेणुका काउचाले रास्वपाको आधिकारिक दस्तावेजमै १८ वर्षमुनिका ३५ हजार २५७ जना सदस्य रहेको औपचारिक रुपमा आएको भन्दै ध्यानाकर्षण जनाएकी हुन् ।  

Watch On

संविधान र राजनीतिक दलसम्बन्धी ऐनअनुसार १८ वर्षमुनिका बालबालिकालाई राजनीतिक दलको सदस्य सदस्य बनाउन नपाइने र यस्तो गरिएमा ८० हजार जरिवाना र तीन वर्षसम्म कैद हुने कानुनी व्यवस्था स्मरण गराउँदै काउचाले सोधिन्, 'के सत्तारुढ रास्वपाको हकमा संविधान र कानुनमा गरिएका व्यवस्था लागु नहुने हो ? कि रास्वपा संविधान माथि छ र उसले संविधान पालना नगरे पनि हुने हो ? त्यसमाथि बालबालिकासम्बन्धी ऐनको दफा ७(७) मा कुनै पनि बालबालिकालाई राजनीतिक उद्देश्यका लागि प्रयोग गर्न नपाउने प्रष्ट प्रावधान छ । यसविपरित गएर रास्वपाले १८ वर्षमुनिका बालबालिकालाई पार्टी सदस्य बनाइएको पाइयो । यही बालबालिकाको मतको भर्याङ चढेर चुनिएका पार्टीका विभिन्न पदाधिकारी र सदस्यको वैधानिकता समेत प्रश्न उठ्ने अवस्था देखियो । यो प्रावधान रास्वपाको हकमा लागु हुने अवस्था छ कि छैन ?'

उनले कलिला विद्यार्थीलाई पार्टीको झोला नबोकाउन र कानुनको पालनामा सबै जिम्मेवार बन्न आग्रह गरिन् ।  

कांग्रेसले प्रथम महाधिवेशनबाट निर्वाचित रास्वपाको नयाँ नेतृत्व र केन्द्रीय सदस्यलाई बधाई तथा शुभकामना समेत दिएको छ ।