सुस्ताको माटो अगाडि राखेर सुस्ताबासीद्वारा माइतिघरमा प्रदर्शन (तस्बिरहरु)

काठमाडौँ ।  नवलपरासी सुस्ता क्षेत्रका बासिन्दाले आफुहरु नेपाली नागरिक भएको प्रमाणपत्र दिन माग गर्दै काठमाडौँ केन्द्रीत आन्दोलन सुरु गरेका छन् । आफुहरुसँग नेपाल नागरिक भएको कुनै प्रमाणपत्र र लालपूर्जा नहुँदा सीमावर्ति क्षेत्रमा भारतीय सुरक्षाकर्मीले निरन्तर दुख दिएको भन्दै उनीहरुले काठमाडौँ आएर आन्दोलन सुरु गरेका हुन् ।

उनीहरुले भारतीय अतिक्रमण रोक्न ठोस कुटनीतिक पहल र सीमा सुरक्षा सुदृढ गर्नुपर्ने, सुस्तावासीलाई तत्काल नेपाली नागरिकता प्रदान गर्नुपर्ने र भोगचलन गरिरहेको जग्गाको लालपूर्जा बितरण गर्नुपर्ने लगाएतका तीन बुँदे माग अघि सारेका छन् ।

Watch On

आन्दोलनका लागि काठमाडौं आएका सुस्तावासीहरुले जेठ १३ गते पछि भारतीय सुरक्षाकर्मीले हातहतियार सहित पटक–पटक नेपाली भूमि सुस्तामा प्रवेश गरेर नेपाली भूमि मिच्ने प्रयास गरिरहेको जनाएका छन् । भारतीय पक्षको सामना गर्न सुस्ताको लालपुर्जा, नेपाली नागरिकता र सिमानामा ’जङ्गे पिलर’ कायम हुनुपर्ने उनीहरुले माग गरेका छन् । भारतीय सुरक्षाकर्मीले पटक पटक नेपाली नागरिकको प्रमाणपत्र र जग्गा नेपालको भएको लालपूर्जा देखाउन दवाव दिने गरेको उनीहरुको भनाइ छ ।  

‘सुस्ता बचाउ अभियान’ को आव्हानमा सुस्ताको माटोसहित काठमाडौं आएका नागरिकहरुले आफुहरुको माग सुनुवाई नभएसम्म घर नफर्कने जनाएका छन् । सरकारले आफुहरुको मागप्रति कुनै सुनुवाई नगरे आन्दोलनलाई थप सशक्त र क्रमिक रूपमा बढाउँदै लैजाने चेतावनी उनीहरुले दिएका छन् ।