काठमाडौँ । वीरगंजस्थित कृषि औजार कारखाना चलाउनका लागि महावीर पुन आफैले लेखेको पुस्तक बेचेरै १ करोड ८० लाख रुपैयाँ संकलन गरेका छन् । पुनले आफ्नै जीवन समेटेर 'महावीर पुन सम्झना, सपना र अविरल यात्रा' नामक पुस्तक लेखेका छन् । 

प्रति पुस्तक ७ सय ५० रुपैयाँमा बिक्रि गर्दै आएको पुस्तक हालसम्म २४ हजार प्रति विक्रि भईसकेको राष्ट्रिय आविष्कार केन्द्रले जनाएको छ । केन्द्रको सहयोगार्थ वैज्ञानिक डा महावीर पुन पुस्तक बिक्रीका लागि पूर्व–पश्चिम महाअभियानमा निस्कएका छन् । तीस वर्षदेखि बन्द रहेको वीरगंज कृषि औजार कारखाना सञ्चालनका निमित्त सहयोग जुटाउने अभियानमा पुन लागेका छन् । 

दुई सातादेखि देश दौरानमा रहेका पुन नौ महिनाको समय लगाएर बन्द रहेको कारखानालाई मर्मत गरी सञ्चालन गर्ने वातावरण बनाई सकेका छन् । सरकारले कारखाना सञ्चालनका लागी रकम नदिएका कारण कृषि औजार उत्पादनका लागि आर्थिक स्रोत जुटाउन पुस्तक प्रकाशित गरी आफैले बिक्री गर्दै आएको बताउँछन् । 

देशव्यापी अभियान रहेकाले बैतडी, महेन्द्रनगर, धनगढी, नेपालगञ्जबाट बुटवल चितवन, वीरगञ्ज, जनकपुर, काँकडभिट्टा, पाँचथर, मध्यपहाडी लोकमार्ग हँुदै काठमाडौँ पुग्ने योजना पुनको छ । 

करिब तीन लाख पुस्तक बिक्री भएको अवस्थामा कृषि औजार कारखाना सञ्चालनमा ल्याउन सकिने उनको विश्वास छ ।