श्रीमानको जन्मघर हेर्न बेलायतबाट बागलुङ पुगेकी सञ्जिता, जसको सपना प्याङ्खोलामा अस्तायो

बलेवा । सञ्जिता अधिकारी आगामी माघ ६ गते बेलायत फर्किने तयारीमा थिइन् । बिहे भएको दुई वर्षसम्म पनि उनले आफ्नो पुर्ख्यौली कर्मघर देखेकै थिइनन् । बिदामा नेपाल आएकी सञ्जिता श्रीमानको जन्मथलो टेक्न चाहन्थिन् । दुर्भाग्य सञ्जिताले श्रीमानको जन्मथलो त टेकिन् तर त्यो बाटो अब कहिल्यै फर्किने छैनन् । 

Watch On

शनिबार बागलुङको ढोरपाटन नगरपालिका–५ प्याङ्खोलामा भएको जीप दुर्घटनामा चन्द्रागिरि नगरपालिका–५ काठमाडौँकी २८ वर्षीया सञ्जिताले ज्यान गुमाइन् । दुर्घटनामा उनको परिवारका सबै सदस्य घाइते भएका छन् ।

ढोरपाटन नगरपालिका–४ छोरेगाउँका दिपक गैरे र चन्द्रागिरि नगरपालिका–५ सतुङ्गलकी सञ्जिता अधिकारी दुई वर्षअघि विवाह गरेर बेलायत पुगेका थिए । दिपक विवाह हुनुपूर्वदेखि नै बेलायत बस्थे । काठमाडौँमै उनीहरुको विवाह भयो, यतैबाट बेलायत लागे ।

बेलायतको दुई वर्षको बसाइपछि यहि पुस ६ गते गते उनीहरू नेपाल आएका थिए । करिब सात वर्ष पहिलादेखि काठमाडौँ बस्दै आएका दिपकको जन्मस्थान घुमेरमात्रै बेलायत फर्कने रहर सञ्जितालाई थियो । लमजुङको पहाडघर छाडेर माइती परिवारसँगै काठमाडौँ बस्दै आएकी सञ्जिताको रहरमै दीपक र उनको परिवार पुस २६ गते जन्मगाउँ छोरेगाउँ पुगेका थिए । “घर जाने कर गरेकै उसैले हो, उसैले छाडेर गई”, दुर्घटनामा घाइते भएकी सञ्जिताकी जेठानी मनकुमारी गैरेले भनिन् ।

गत पुस २६ गते साँझ उनीहरू गाउँ पुगेका थिए । पुस २७ गते जेठो दाजू विवराज गैरेसँग दिपक, सञ्जिता र उनको परिवारले जन्मगाउँ छोरेगाउँ घुमेका थिए । सञ्जितालाई बाल्यकालको रमाइलो सुनाउँदै २८ पुसमा ढोरपाटन घुम्ने योजना बनाएका दिपक दुर्घटनामा गम्भीर घाइते छन् ।

सालझण्डी–ढोरपाटन सडकखण्डअन्तर्गत शनिबार बिहान ढोरपाटनतर्फ गइरहेको ध १ज १९ नम्बरको जीप ढोरपाटन नगरपालिका–५ प्याङ्खोला अस्तुमा दुर्घटना भयो । जहाँ श्रीमानको गाउँ घुमेर माघ ६ गते बेलायत जाने योजनामा रहेकी सञ्जितासँगै सवारी चालक ढोरपाटन–४ खुङ्गाका तिलक घर्तीको समेत ज्यान गयो । सग्लो परिवार सवार जीप सडकमा पल्टेपछि परिवारका सदस्य गम्भीर घाइते छन् । घर घुमाउन श्रीमती र परिवार लिएर आएका दिपकलाई उपचारका लागि हेलिकप्टरमा पोखराको मणिपाल शिक्षण अस्पताल लगिएको छ ।

मृतक सञ्जिताका श्रीमान दीपक, आफन्त विवराज, जोगनारायण गैरे र उनकी श्रीमती निरुता गैरे, छोरी कल्पना गैरे, कृष्ण गैरे र उनकी श्रीमती हिमा गैरे तथा मनकुमारी गैरे दुर्घटनामा घाइते भएका प्रहरी निरीक्षक दीपकबाबु केसीले  जानकारी दिए । 

घाइते सबैको बुर्तिबाङ प्राथमिक स्वास्थ्य केन्द्रमा सामान्य उपचार गरिएको थियो । थप उपचारका लागि उनीहरुलाई हेलिकप्टरमा मणिपाल शिक्षण अस्पताल पोखरा लगिएको छ । मनकुमारीका अनुसार गैरे परिवारले ढोरपाटन घुम्नकै लागि जीप रिजर्भ गरेका थिए । दुर्घटनाको कारण भने खुल्न नसकेको प्रहरी निरीक्षक केसीले बताए ।

(परिवारका सदस्यबाट समाचारमा प्रयाेग गरिएका फाेटाेले पीडाबाेध भएकाे गुनासाे प्रेस काउन्सिल मार्फत प्राप्त भएपछि ति फाेटाे हटाइएकाे छ - सम्पादक)