पन्ध्रौं महाधिवेशनमा सबै सहभागी हुने वातावरण बन्छः विश्वप्रकाश

काठमाडौँ । नेपाली कांग्रेसको इतर पक्षले सहमतिका लागि पाँच बुँदे प्रस्ताव सार्वजनिक गरिरहँदा संस्थापन पक्षले भने सहमतिका लागि प्रयास भइरहेको जनाएको छ ।

आज पार्टी कार्यालय सानेपामा आयोजित पत्रकार सम्मेलनमा उपसभापति विश्वप्रकाश शर्माले संवाद र छलफल भइरहेको र सकारात्मक ढंगले टुंगिने दाबी गरे ।

Watch On

‘पन्ध्रौं महाधिवेशनमा सबै सहभागी बन्ने वातावरण सहज बनाउनुपर्छ भनेर संवाद र छलफल भइरहेको छ, सकारात्मक ढंगले टुंगिन्छ भन्नेमा विश्वस्त छौं’ शर्माले भने ।

सोही पत्रकार सम्मेलनमा उपसभापति शर्माले प्रदेश सरकारहरुमा केही समस्या देखिएको र ती समस्या समाधान गर्न पनि मुख्य दलहरुका बीचमा छलफल भइरहेको जानकारी दिए ।

‘प्रदेश सरकारका सन्दर्भमा केही समस्या देखिएको छ, सार्वजनिक रुपमा धेरै टिप्पणी गरेर भन्दा आन्तरिक रुपमा अभ्यास र संवाद भइरहेको छ’ उनले भने । त्यस्तै, उनले कुनै पनि प्रदेश सरकार प्रतिपक्षविहीन हुनुहुँदैन भन्ने कांग्रेसको सर्त रहेको शर्माले बताए ।

‘हाम्रो बटमलाइन कुनै पनि प्रदेशसभा प्रतिपक्षविहीन हुनुहुँदैन, आवश्यक पर्यो भने कांग्रेस नै प्रतिपक्षमा बस्न तयार छ’ उनले भने ।

उपसभापति शर्माले वर्तमान संविधानको निर्माण गर्दै गर्दा महत्वपूर्ण भूमिका निर्वाह गरेका दलहरुले संविधानको मूल मर्मलाई बिर्सन नमिल्नेसमेत बताए ।