बाइनान्समार्फत २ अर्ब १६ करोडको क्रिप्टो कारोबार गरेको आरोपमा सुनिल पक्राउ

काठमाडौँ। क्रिप्टोकरेन्सी कारोबार गर्ने अनलाइन प्लेटफर्म बाइनान्समा रहेको खातामार्फत २ अर्ब १६ करोड रुपैयाँभन्दा बढी मूल्यको क्रिप्टोकरेन्सी कारोबार गरेको आरोपमा प्रहरीले धनुषाका २८ वर्षीय सुनिल कुमार यादवलाई पक्राउ गरेको छ।

Watch On

काठमाडौं उपत्यका अपराध अनुसन्धान कार्यालयका अनुसार यादवले आफ्नो बाइनान्स खातामार्फत २ करोड ६९ लाख ९१ हजार ३८८.५० यूएसडीटी ९ग्क्म्त्० बराबरको कारोबार गरेका थिए। प्रहरीले एक यूएसडीटीको मूल्य १५१ रुपैयाँ ५३ पैसा कायम गर्दा उक्त कारोबारको कुल मूल्य २ अर्ब १६ करोड १ लाख २० हजार ८२१ रुपैयाँ हुने जनाएको छ।

नेपाल राष्ट्र बैंकको नीति तथा प्रचलित कानुनविपरीत विभिन्न वित्तीय माध्यम र अनलाइन बेटिङ एपमार्फत सट्टेबाजी गर्ने तथा गराउने र अवैध रूपमा क्रिप्टोकरेन्सीको ठूलो कारोबार भइरहेको विशेष सूचनाका आधारमा प्रहरीले अनुसन्धान थालेको थियो।

कार्यालयबाट खटिएको प्रहरी टोलीले सूक्ष्म निगरानी र प्राविधिक विश्लेषणका आधारमा अनुसन्धान गर्दा यादवको संलग्नता खुलेपछि जिल्ला प्रहरी कार्यालय धनुषासँगको समन्वयमा उनलाई पक्राउ गरेको हो।

प्रहरीका अनुसार यादवविरुद्ध मुलुकी अपराध संहिता, २०७४ को दफा १२५ अन्तर्गत जुवा खेल्न वा सट्टेबाजी गर्न नहुने कसुर र दफा २६२९क०९१० अन्तर्गत अभौतिक मुद्राको प्रयोग गर्न नहुने कसुरमा अनुसन्धान भइरहेको छ।

काठमाडौं जिल्ला अदालत, बबरमहलबाट म्याद थप गरी यादवमाथि थप अनुसन्धान तथा आवश्यक कानुनी कारबाही अघि बढाइएको काठमाडौं उपत्यका अपराध अनुसन्धान कार्यालयले जनाएको छ।

यादव धनुषाको सबैला नगरपालिका–१२ का स्थायी बासिन्दा हुन्।