न्यायपालिकाको प्रतिष्ठामा आँच पुग्ने गरी कुनै कार्य गरेको छैनः न्यायाधीश हरि फुयाल

काठमाडौँ । सर्वोच्च अदालतका न्यायाधीश हरि प्रसाद फुयालले न्यायपालिकासम्बन्धी सार्वजनिक भएका विवरण र समाचारप्रति आफ्नो गम्भीर ध्यानाकर्षण भएको जनाएका छन् ।

Watch On

बुधबार जारी गरेको वक्तव्यमा उनले स्वतन्त्र, निष्पक्ष र सुशासनसहितको न्यायपालिकाप्रति आफ्नो पूर्ण प्रतिबद्धता रहेको उल्लेख गर्दै नेपालको न्यायिक विचलनसम्बन्धी भइरहेको अनुसन्धानप्रति पूर्ण समर्थन र सहयोग रहने प्रतिबद्धता व्यक्त गरेका छन् ।

पछिल्लो समयमा न्याय क्षेत्रमा देखिएको अस्थिरता, असुरक्षा र विसंगतिको गलत फाइदा उठाइएका कार्यहरू राज्यको जानकारीमा आई अनुसन्धान भइरहेको वक्तव्यमा उल्लेख छ ।

आफ्नो बारेमा आएका तथ्य र समाचारलाई देश र न्यायक्षेत्रको अस्थिरता तथा असुरक्षाभन्दा बाहिरबाट नहेर्न आग्रह गर्दै प्रधानन्यायाधीश फुयालले समग्र न्यायक्षेत्रका निकाय, व्यक्ति, सरोकारवाला र आम सञ्चारमाध्यमलाई अनुरोध गरेका छन् ।

उनले न्यायिक विचलन, निष्ठा र नेपालको न्यायपालिकाको प्रतिष्ठामा आँच पुग्ने गरी आफूबाट कुनै कार्य नभएको दाबी गरेका छन् । न्यायिक विचलन ल्याउने कार्य अनुसन्धानको प्रक्रियामा रहेको उल्लेख गर्दै उनले यस परिस्थितिमा आफूविरुद्ध भ्रम सिर्जना गरिएको, अर्थसत्य फैलाइएको र चलिरहेको अनुसन्धानलाई प्रभाव पार्ने गरी भएका कार्यप्रति दुःख व्यक्त गरेका छन् ।

प्रधानन्यायाधीश फुयालले सम्पूर्ण न्यायाकर्मीलाई न्यायपालिकाप्रतिको विश्वास थप कायम राख्नसमेत हार्दिक अनुरोध गरेका छन् ।

वक्तव्यमा उनले न्यायपालिकाको स्वतन्त्रता, निष्पक्षता र संस्थागत प्रतिष्ठा कायम राख्ने प्रतिबद्धता दोहोर्‍याएका छन् ।