क्रियाशील सदस्यता टुंग्याउँदै कांग्रेस, यस्ता छन् पाँच निर्णय

काठमाडौँ । महाधिवेशनकाे संघारमा रहेको नेपाली कांग्रेस क्रियाशील सदस्यता व्यवस्थापनमा जुटेको छ । 

पार्टीका महामन्त्री प्रदीप पौडेलले सदस्यता व्यवस्थापन केन्द्रीय समितिको संयोजकका रुपमा सदस्यता टुंग्याउने कामको अगुवाइ गरिरहेका छन् । 

Watch On

उनकाअनुसार सदस्यता व्यवस्थापन समितिले विभिन्न निर्णयहरु गरेको छ । 0

पहिलो प्रतिनिधि सभा क्षेत्र र वडा तहमा वडा सभापति मार्फत नयाँ क्रियाशील सदस्यता आवेदन र अनलाइन सिष्टम मार्फत स्वयं सदस्यता आवेदन फारम भरी वडा सभापतिको पोर्टलमा होल्डमा रहेका क्रियाशील सदस्यहरुको सदस्यता आवेदन वडा सभापतिले अनुमोदन गर्ने अन्तिम मिति साउन १४ गतेसम्म तोकिएको छ । यसैगरी पालिका र प्रतिनिधि सभा क्षेत्रले मातहतका तहबाट अनुमोदन गरि पठाएको मितिले ३/३ दिन भित्र नयाँ क्रियाशिल सदस्यको अनुमोदन गरी सक्नुपर्नेछ ।

दाेस्राे सदस्यता व्यवस्थापन केन्द्रीय समितिको पूर्व निर्णय बमोजिम भातृ संघ तथा शुभेच्छुक संस्था, इन्टरनेटको पहुँच कम भइ अद्यावधिक गर्न छुटेका उच्च हिमाली र विकट पहाडी जिल्लाका सदस्यहरुको अद्यावधिक गर्ने कार्य एक्सेल फारम मार्फत केन्द्रबाट गरिने हुँदा त्यस्ता अद्यावधिक फारमहरु साउन १५ गतेभित्र केन्द्रमा बुझाइसक्नु पर्नेछ । एक्सेल फारम मार्फत प्राप्त भएका सदस्यहरुको सदस्यता अद्यावधिक केन्द्रबाट गरिनेछ ।

तेस्रो, प्रतिनिधि सभा क्षेत्र तथा मातहतका सभापतिहरुले क्रियाशील सदस्यता अद्यावधिक नगरी डिजिटल सिष्टममा अद्यावधिक हुन नसकेका तहहरुको हकमा सभापतिहरुको वैकल्पिक व्यवस्था गरी क्रियाशील सदस्यता अद्यावधिक र नयाँ क्रियाशील सदस्यता अनुमोदन गर्नका लागि केन्द्रीय प्रतिनिधिको सिफारिसमा सभापति तोकी केन्द्रीय कार्यसमितबाट अनुमोदनका लागि पेस गर्नेछ ।

चाैथो, कुनै जिल्लामा विविध कारणले क्रियाशील सदस्यता अद्यावधिक गर्न छुट भएका क्रियाशील सदस्यहरुको सदस्यता अद्यावधिक गर्ने कार्य केन्द्रीय प्रतिनिधिको सिफारिसमा केन्द्रले गर्नेछ ।

 कांग्रेसका कार्यवाहक मुख्य सचिव कृष्णप्रसाद दुलालकाअनुसार पाँचौमा कुनै वडामा क्रियाशील सदस्यता संख्या ४० भन्दा कम र ३५ वर्ष भन्दा कम उमेर समूहका सदस्यहरुको संख्या ५ भन्दा कम भएको अवस्थामा त्यस्ता वडाहरुमा केन्द्रीय प्रतिनिधिको सिफारिसमा केन्द्रबाट क्रियाशील सदस्यता प्रदान गर्ने निर्णय भएको छ ।