‘राजनीतिक रूपमा हामीले लड्ने मैदान फरक छन्, तर यस्तो बेला हामी एकै ठाउँमा उभिएका छौं’

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले सुनसरी घटनाका विषयमा सबै राजनीतिक दलको साझा धारणा सार्वजनिक गर्दै छिट्टै संयुक्त अपिल जारी गरिने बताएका छन्।

बुधबार सिंहदरबारमा आफूले बोलाएको सर्वदलीय बैठकपछि सञ्चारकर्मीसँग कुरा गर्दै लामिछानेले सुनसरी घटनाप्रति सबै दल एकै ठाउँमा उभिएको जानकारी दिए । उनले भने, ‘राजनीतिक रूपमा हामीले लड्ने मैदान फरक–फरक छन्, तर यस्तो बेला हामी एकै ठाउँमा उभिएका छौं । सबै दलको एउटा संयुक्त अपिल छिट्टै आउँछ ।’

Watch On

उनले बैठक दलहरूको तर्फबाट सरकारको ध्यानाकर्षण गराउने उद्देश्यले आयोजना गरिएको स्पष्ट पारे । बैठकमा सहभागी विभिन्न राजनीतिक दलका शीर्ष नेताहरूले घटनाबारे आफ्नो धारणा र मार्गनिर्देशन प्रस्तुत गरेको उनले जानकारी दिए ।

लामिछानेका अनुसार सरकारले पनि सुनसरी घटनाका सन्दर्भमा आफ्नो काम गरिरहेको छ । सर्वदलीय बैठकबाट प्राप्त सुझाव र राजनीतिक दलहरूको धारणालाई सरकारसमक्ष औपचारिक रूपमा ध्यानाकर्षण गराइने उनले बताए ।

प्रधानमन्त्री र गृहमन्त्री बैठकमा अनुपस्थित रहेको विषयमा सञ्चारकर्मीले उठाएको प्रश्नको जवाफ दिँदै लामिछानेले यो बैठक राजनीतिक दलका शीर्ष नेताहरूबीचको भएकाले सरकारका तर्फबाट अर्थमन्त्री डा. स्वर्णिम वाग्लेले प्रतिनिधित्व गरेको बताए ।

उनले सुनसरी घटनाजस्तो संवेदनशील विषयमा दलहरूबीच एकता आवश्यक रहेको उल्लेख गर्दै संयुक्त अपिलमार्फत शान्ति, संयम र जिम्मेवार भूमिका निर्वाह गर्न सबै पक्षलाई आग्रह गरिने जानकारी दिए ।