तराई–मधेस तनावबारे निष्पक्ष छानबिन गर्न राप्रपाले गरायो सरकारको ध्यानाकर्षण

काठमाडौं । राष्ट्रिय प्रजातन्त्र पार्टी (राप्रपा) ले तराई–मधेसमा हालै भएका हिंसात्मक घटनाहरूको निष्पक्ष, स्वतन्त्र तथा विश्वसनीय छानबिन गरी दोषीमाथि कारबाही र पीडितलाई न्याय दिलाउन सरकारसँग जोडदार माग गरेको छ । शुक्रबार काठमाडौँमा अध्यक्ष राजेन्द्र लिङ्देनको अध्यक्षतामा बसेको पार्टीको केन्द्रीय कार्यसम्पादन समितिको बैठकले पछिल्ला घटनाक्रमबारे गहिरो समीक्षा गर्दै उक्त धारणा सार्वजनिक गरेको हो ।

राप्रपाले तराई–मधेसमा ज्यान गुमाएका नागरिकप्रति श्रद्धाञ्जली र घाइतेको स्वास्थ्यलाभको कामना गर्दै धनुषाको रघुनाथपुरस्थित हनुमान मन्दिरका रेखदेखकर्ताको रहस्यमय हत्याको कडा निन्दा गरेको छ । प्रहरीको गोली प्रहारबाट नागरिकको ज्यान जानुमा भिड व्यवस्थापनमा गम्भीर प्रशासनिक कमजोरी देखिएको भन्दै पार्टीले राज्यले संयमता गुमाउँदा तनावपूर्ण अवस्था सिर्जना भएको निष्कर्ष निकालेको छ । समस्याको समाधान दमन र गोली प्रहारबाट नभई संवाद, सहिष्णुता र विधिको शासनबाट खोजिनुपर्नेमा राप्रपाको जोड छ ।

Watch On

विशेषगरी हिन्दु चाडपर्व वा धार्मिक महोत्सवका बेला पटक–पटक तनाव र साम्प्रदायिक विवाद उत्पन्न हुने क्रमप्रति गम्भीर ध्यानाकर्षण भएको जनाउँदै राप्रपाले यस्ता घटनाको पृष्ठभूमि, योजनाबद्ध पक्ष र सुरक्षा कमजोरीको गहिरो अध्ययन गर्न सरकारलाई आग्रह गरेको छ । यस्ता घटना सधैँका लागि अन्त्य गर्न सर्वपक्षीय समिति बनाएर तत्काल संवाद थाल्न र नागरिकले निर्भयपूर्वक आफ्नो धर्म र संस्कृतिको अभ्यास गर्न पाउने वातावरण सुनिश्चित गर्न पनि सरकारको ध्यानाकर्षण गराइएको छ ।

यसका साथै, राप्रपाले २०६२/६३ को राजनीतिक परिवर्तनपश्चात् अवलम्बन गरिएको वैचारिक तथा संवैधानिक मार्गचित्रले राष्ट्रिय एकता सुदृढ गर्न नसकेको भन्दै त्यसमाथि गम्भीर राष्ट्रिय समीक्षा अपरिहार्य भएको ठहर गरेको छ ।

वैदिक सनातन धर्मसापेक्ष हिन्दुराष्ट्रको पुनस्र्थापनाको एजेन्डा कुनै समुदायको अधिकार सीमित गर्न नभई नेपालको ऐतिहासिक पहिचान, सांस्कृतिक निरन्तरता र सबैको धार्मिक स्वतन्त्रता सुनिश्चित गर्न भएको पार्टीले पुनः प्रस्ट पारेको छ । पछिल्लो दुई दशकको अभ्यासले हिन्दुराष्ट्रको आवश्यकता प्रमाणित गरिसकेको भन्दै राप्रपाले सम्पूर्ण नेपाली नागरिकलाई संयम, विवेक, सहिष्णुता र राष्ट्रिय एकताको पक्षमा दृढतापूर्वक उभिन आह्वान समेत गरेको छ ।