नवनियुक्त प्रमुख निर्वाचन आयुक्त र आयुक्तसहितको आयोगको बैठकले के गर्‍यो निर्णय?

काठमाडौं । प्रमुख निर्वाचन आयुक्त मानबहादुर कार्की, आयुक्त गुरुप्रसाद वाग्ले र डा. राजीव सुब्बाले पद बहाली गर्दै बसेको आयोगको बैठकले संसदमा पेस हुने क्रममा रहेको एकीकृत निर्वाचन व्यवस्थापन विधेयकको मस्यौदा अनुरूपको प्रत्यायोजन विधायनको मस्यौदा तयार गर्ने निर्णय गरेको छ ।

बिहीबार बसेको बैठकले निर्वाचनमा आधुनिक सूचना प्रविधिको प्रयोगसम्बन्धी अवधारणापत्र तयार गर्ने, मतदाता नामावली त्रुटिरहित, अद्यावधिक तथा विश्वसनीय बनाउन मतदाता नामावली अद्यावधिक कार्यक्रम सञ्चालन गर्ने निर्णय गरेको छ ।

Watch On

यस्तै नागरिक अपेक्षा र प्रविधिको विकासले ल्याएका सम्भावनाअनुरूप निर्वाचन सुधारका रणनीति तयार तथा परिमार्जन गर्न चौथो पञ्चवर्षीय रणनीतिक योजनाको मध्यावधिक समीक्षा गर्ने निर्णय गरेको प्रवक्ता नारायणप्रसाद भट्टराईले जानकारी दिए ।

‘आजै प्रमुख निर्वाचन आयुक्त मानवहादुर कार्कीले आयोगका कर्मचारीहरूलाई निर्देशन सहितको सम्बोधन गर्नुभएको छ । उक्त सम्बोधनको क्रममा उहाँले स्वच्छ, स्वतन्त्र, निष्पक्ष, भयरहित र समावेशी निर्वाचन सम्पन्न गर्ने जिम्मेवारी रहेको निर्वाचन आयोग लोकतन्त्रको मेरूदण्ड र जनमतको रक्षा कवच भएकोले आयोगको गरिमा तथा जनविश्वासलाई अझ उच्च बनाउन विधि, प्रविधि र व्यवस्थापकीय क्षेत्रमा थप सुधारको लागि योजनावद्ध, नतिजामुखी तथा समयबद्ध रूपमा कार्य सम्पादन गर्न आग्रह गर्नुभएको छ । कार्य सम्पादनका क्रममा सूचना प्रविधिको अधिकतम प्रयोग गर्न, सेवाप्रवाहलाई थप प्रभावकारी बनाउन, कर्मचारी आचारसंहिताको पूर्ण पालना गर्न तथा उच्च मनोबल, व्यावसायिकता र उत्तरदायित्वका साथ कार्यसम्पादन गर्न कर्मचारीहरूलाई निर्देशन दिनुभयो,’ प्रवक्ताले जारी गरेको विज्ञप्तिमा भनिएको छ ।