सबै पालिकामा मिसन पार्टी जागरण अभियान सुरु गर्न एमाले महासचिव पोखरेलको निर्देशन

काठमाडौं । नेकपा (एमाले)का महासचिव शंकर पोखरेलले ‘मिसन पार्टी जागरण’लाई पार्टी पुनर्जागरण र संगठन सुदृढीकरणको महत्वपूर्ण अभियानका रूपमा अघि बढाउन सबै पालिकामा तत्काल अभियान सुरु गर्न निर्देशन दिएका छन् ।

सोमबार प्रदेश कमिटीका पदाधिकारी तथा ‘मिसन पार्टी जागरण’का केन्द्रीय प्रतिनिधिहरूसँग भएको भर्चुअल बैठकलाई सम्बोधन गर्दै पोखरेलले पार्टी र जनताबीचको सम्बन्धलाई थप मजबुत बनाउने उद्देश्यले अभियान सञ्चालन गरिएको बताए । अभियानलाई प्रभावकारी बनाउन पार्टी कमिटीसँगै जनसंगठनलाई पनि सक्रिय रूपमा परिचालन गर्न उनले आग्रह गरे ।

Watch On

उनका अनुसार अहिले जिल्ला कमिटीहरूले बैठकमार्फत कार्ययोजना तयार गरी अभियान अघि बढाइरहेका छन् भने पार्टीले पालिका तहसम्म केन्द्रीय प्रतिनिधि खटाइसकेको छ । वर्ग, समुदाय र विभिन्न पेशागत क्षेत्रलाई समेटेर अभियान सञ्चालन गर्न उनले निर्देशन दिए ।

पार्टी सुदृढीकरणका लागि विचार, संगठन र नेतृत्व तीनै पक्षमा पुनर्गठन आवश्यक रहेको उल्लेख गर्दै पोखरेलले जनताको बहुदलीय जनवादलाई समयानुकूल रूपमा थप समृद्ध बनाउँदै लैजानुपर्ने बताए । स्थानीय कमिटीहरूलाई चलायमान बनाउन पुनर्गठन, रिक्त पदपूर्ति तथा संगठन विस्तारका कामलाई प्राथमिकता दिन पनि उनले निर्देशन दिए ।

युवा सहभागिता बढाउने उद्देश्यले विगतमा ल्याइएका नीति व्यवहारमा प्रभावकारी रूपमा लागू हुन नसकेको स्वीकार गर्दै उनले ‘मिसन पार्टी जागरण’ पनि निर्देशनमै सीमित नहोस् भन्नेमा विशेष ध्यान दिन आग्रह गरे । पार्टीलाई सुधार र रूपान्तरणको नयाँ चरणमा लैजान संस्थागत निर्णयमार्फत अघि बढाइने उनको भनाइ थियो ।

महासचिव पोखरेलले पार्टी सदस्यता नवीकरण अभियानलाई सफल बनाउन मातहतका कमिटीलाई निर्देशन दिँदै आवश्यक परे पार्टी केन्द्रबाट थप सहजीकरण गरिने बताए ।

वर्तमान राजनीतिक अवस्थाबारे धारणा राख्दै उनले शासन सञ्चालनको अनुभव नभएका व्यक्तिहरू सरकारमा पुगेकाले मुलुक संकटतर्फ धकेलिएको दाबी गरे । विभिन्न स्वार्थ समूहको सक्रियता बढिरहेको उल्लेख गर्दै उनले सरकारले सुरुदेखि नै पूर्वाग्रह र प्रतिशोधको राजनीति गरेको तथा अहिले कानुन र विधिलाई बेवास्ता गर्दै स्वेच्छाचारी प्रवृत्तितर्फ उन्मुख भइरहेको आरोप लगाए ।

सरकारको गतिविधिविरुद्ध आवश्यक परे कुनै पनि बेला सडक आन्दोलनमा जानुपर्ने अवस्था आउन सक्ने भन्दै मातहतका पार्टी कमिटीलाई त्यसका लागि तयारी अवस्थामा रहन पनि उनले निर्देशन दिए ।

बैठकमा पार्टी सचिव तथा संगठन विभाग प्रमुख भानुभक्त ढकालले सदस्यता नवीकरण अभियानको प्रारम्भिक प्रगति उत्साहजनक रहेको जानकारी दिए । असार मसान्तसम्मको समयसीमा तोकिए पनि सदस्यता नवीकरणलाई निरन्तरता दिनुपर्ने उनले बताए ।

भर्चुअल बैठकमा प्रदेश अध्यक्षहरूले ‘मिसन पार्टी जागरण’ अभियान, सदस्यता नवीकरण र संगठनात्मक गतिविधिबारे आ–आफ्नो प्रदेशको प्रगति विवरण प्रस्तुत गरेका थिए ।