अध्यक्ष ओलीले कोशीका मुख्यमन्त्री कार्कीसहितका नेतासँग छलफल गर्दै

काठमाडौं । नेकपा एमालेका अध्यक्ष केपी शर्मा ओलीले मंगलबार कोशी प्रदेशका मुख्यमन्त्री हिक्मत कार्की र पार्टी प्रदेश अध्यक्ष घनश्याम खतिवडासँग छलफल गर्दैछन् ।

नयाँ मुख्यमन्त्री चयनमा पार्टीभित्रै विवाद बढिरहेका बेला अध्यक्ष ओलीले प्रदेश इन्चार्ज शेरधन राई, मुख्यमन्त्री कार्की र प्रदेश अध्यक्ष खतिवडालाई काठमाडौं आउन निर्देशन दिएका थिए ।
अध्यक्ष ओलीको निर्देशनपछि नेतात्रय मंगलबार जहाजमार्फत काठमाडौं आउन लागेको एक नेताले बताए ।

Watch On

कार्कीलाई हटाएर ताप्लेजुङका प्रदेश सांसद  तिलकुमार मेन्याङ्बोलाई कोशी प्रदेशको मुख्यमन्त्री बनाउन खोजेका अध्यक्ष ओलीले विराटनगरमा कुनै प्रगति नभएपछि कार्की र खतिवडालाई काठमाडौँ डाकेका हुन् । 
ओली, इन्चार्ज राई, मुख्यमन्त्री कार्की र प्रदेश अध्यक्ष खतिवडाबीच भक्तपुरको गुण्डुस्थित ओली निवासमै छलफल गराउने तयारी छ ।

ओलीले आफ्नो प्रतिनिधिका रुपमा पार्टी सचिव एवम् पूर्वमुख्यमन्त्री राईलाई विराटनगर पठाएका थिए । राईले कार्कीलाई राजीनामा दिएर मार्गप्रशस्त गर्न अध्यक्षका तर्फबाट आग्रह गरे पनि कार्कीले उक्त आग्रह अस्वीकार गरेपछि विवाद बढेको हो ।

गत साता एमालेका चार शीर्ष नेता अध्यक्ष ओली, उपाध्यक्ष रामबहादुर थापा र विष्णु पौडेल तथा महासचिव शंकर पोखरेलका बीचमा कोशीमा कार्कीलाई निरन्तरता दिने सहमति भएको थियो । तर, उक्त सहमतिविपरीत ओलीले मेन्याङ्बोलाई मुख्यमन्त्री बनाउन खोजेपछि सिंगो एमाले तरंगित छ ।

कार्कीले आफूले मुख्यमन्त्री छाड्नुपर्ने भए पार्टी सचिवालयले लिखित रुपमा निर्णय गर्नुपर्ने शर्त राखेका छन् ।

तर, ओलीले भने लिखित निर्देशन नदिई मौखिक निर्देशन मात्र दिइरहेका छन् ।

भोलिको छलफलमा महासचिव शंकर पोखरेल भने सहभागी हुने छैनन् । पोखरेल पूर्वनिर्धारित कार्यक्रम अनुसार दाङ जाने छन् ।

एमालेमा कोशी प्रदेशका मुख्यमन्त्री कार्की र प्रदेश अध्यक्ष खतिवडा दुवै जना अध्यक्ष ओली पक्षधर हुन् । तर, पछिल्लो समय ओली र कार्की टाढिँदै गएका छन् ।