एमालेमा तत्काल बैठक बोलाएर निर्वाचन पराजयको समीक्षा र पुनर्गठन गर्न माग

काठमाडौं । नेकपा एमालेभित्रैबाट केन्द्रीय कमिटीको बैठक तत्काल बोलाएर निर्वाचनमा भएको पराजयको समीक्षा गर्न तथा पार्टी पुनर्गठनको प्रक्रिया अघि बढाउन माग गरिएको छ ।

एमाले पुनर्जागरण अभियानले अध्यक्ष केपी शर्मा ओलीलाई सम्बोधन गर्दै पठाइएको पत्रमा पार्टीभित्र देखिएको अन्योल अन्त्य गर्न तत्काल छलफल, समीक्षा र निर्णयको प्रक्रिया अघि बढाउन माग गरिएको हो । पत्रमा निर्वाचन समीक्षा तथा पार्टी पुनर्गठन कार्यदलको प्रतिवेदन सचिवालय र केन्द्रीय कमिटीमा छलफल, अध्ययन तथा सार्वजनिक गर्नुपर्ने मागसमेत गरिएको छ ।

Watch On

पत्रमा २०८२ फागुन २१ गते सम्पन्न निर्वाचनको परिणामले पार्टीले जनताको विश्वास गुमाउँदै गएको कठोर सन्देश दिएको उल्लेख छ । निर्वाचनमा भएको पराजयको समीक्षा गरी त्यसबाट पाठ सिक्दै पार्टीलाई पुनर्जीवन दिन र जनतामा नयाँ आशा तथा विश्वास पैदा गर्ने दिशामा अघि बढ्नुपर्नेमा जोड दिइएको छ ।

पार्टीभित्रको कमजोरी, बदलिँदो भू–राजनीतिक परिस्थिति तथा प्रविधि र एल्गोरिदमको प्रभावसमेत वर्तमान अवस्थाका कारण रहेको पत्रमा उल्लेख छ । त्यस्तै सरकारका कतिपय नीतिगत अन्योल र शासन सञ्चालनमा देखिएको अपरिपक्वताले राष्ट्रिय हित तथा राष्ट्रिय सुरक्षाका विषयमा चिन्ता बढाएको दाबी गरिएको छ । छिमेकी तथा अन्तर्राष्ट्रिय सम्बन्ध थप जटिल बन्दै गएको र जनताको दैनिक जीवनसमेत थप कष्टकर बन्दै गएको पत्रमा उल्लेख छ ।

एमालेले यसअघि निर्वाचन समीक्षा तथा पार्टी पुनर्गठनका लागि १६ सदस्यीय कार्यदल गठन गरेको थियो । उक्त कार्यदलले जेठ ३० देखि असार २३ गतेसम्म सातै प्रदेशमा १३ वटा क्लस्टरमा सुझाव संकलन गरेको र असार २५ गते बसेको बैठकले संयोजक तथा सदस्य–सचिवलाई प्रतिवेदन तयार गर्ने जिम्मेवारी दिएको पत्रमा उल्लेख छ । प्रतिवेदन तयार भइसकेको जानकारीसमेत सञ्चारमाध्यमबाट सार्वजनिक भएको जनाइएको छ ।

तर कार्यदलको प्रतिवेदन तयार भइसकेपछि पनि पार्टीका महत्वपूर्ण निकायको बैठक नबोलाइएको भन्दै पत्रमा असन्तुष्टि जनाइएको छ । यसले पार्टी पंक्तिमा थप अन्योल र निराशा सिर्जना गरेको उल्लेख गर्दै ढिलाइ नगरी कमिटीको बैठक बोलाएर सामूहिक छलफल, समीक्षा र निर्णयमार्फत पार्टीलाई निकास दिनुपर्ने माग गरिएको छ ।

पत्रमा निर्वाचन समीक्षा तथा पार्टी पुनर्गठन कार्यदलको बैठक बसाली प्रतिवेदन सचिवालय र केन्द्रीय कमिटीमा छलफल, अध्ययन तथा सार्वजनिक गर्नुपर्ने, केन्द्रीय सचिवालयको बैठक तत्काल बोलाउनुपर्ने र केन्द्रीय कमिटीको बैठक अविलम्ब आयोजना गर्नुपर्ने माग गरिएको छ ।

त्यस्तै निर्वाचनमा भएको पराजयको वस्तुनिष्ठ र निर्मम समीक्षा गर्न, पार्टीलाई शुद्धीकरण, सुदृढीकरण, रूपान्तरण र पुनर्संरचनाको ठोस खाका निर्माण गर्न तथा नेता–कार्यकर्ताको मनोबल उठाउँदै जनतासँगको सम्बन्ध पुनःस्थापित गर्न माग गरिएको छ ।

आठबुँदे मागमा कमिटी प्रणाली, सामूहिक निर्णय र आन्तरिक लोकतन्त्रलाई प्रभावकारी बनाउनुपर्ने तथा पार्टीलाई नयाँ ऊर्जा, नयाँ कार्यशैली र नयाँ विश्वाससहित पुनर्गठित गर्ने दिशामा तत्काल ठोस पहल गर्नुपर्ने उल्लेख छ ।

पत्रमा एमालेभित्रको समस्याको समाधान पार्टी बाहिर नभई पार्टीभित्रको विधिसम्मत, लोकतान्त्रिक र कमिटी प्रणालीमा आधारित सामूहिक छलफल, आत्मसमीक्षा र निर्णयबाटै सम्भव हुने निष्कर्ष निकालिएको छ । ‘व्यक्तिभन्दा पार्टी, पदभन्दा नीति, लाभभन्दा आत्मसमीक्षा र जडताभन्दा रूपान्तरण’ अहिलेको आवश्यकता भएको पत्रमा उल्लेख छ ।

पत्रको अन्त्यमा केन्द्रीय कमिटीको बैठक ढिला नगरी बोलाएर निर्णय समीक्षा गर्न, कमजोरी सच्याउन, पार्टीलाई पुनर्गठित गर्न र जनताको विश्वास पुनःअर्जन गर्न आग्रह गरिएको छ । पत्रमा ‘रूपान्तरण र पुनर्गठनका लागि पुनर्जागरण अभियान–२०८२’ अघि बढाउनसमेत माग गरिएको छ ।

एमालेमा नेपाल बुद्धिजीवी परिषद अध्यक्ष गजेन्द्र थपलिया, रोशन बस्नेत, नवीना लामालगायत नेताहरूले पुनर्जागरण अभियान चलाएका छन् । शीर्ष नेताहरूसँग अनौपचारिक छलफल गर्दै पुनर्गठनको पक्षमा उभिन दबाब सिर्जना गरिरहेका छन् ।