१० महिनापछि कांग्रेसीसँग एउटै सार्वजनिक मञ्चमा देउवा (तस्बिरहरू)

काठमाडौं । नेपाली कांग्रेसका पूर्वसभापति एवं पूर्वप्रधानमन्त्री शेरबहादुर देउवा करिब १० महिनापछि कांग्रेस नेताहरूसँग एउटै सार्वजनिक मञ्चमा देखिएका छन् ।

पछिल्लोपटक २०८२ असोज २८ गते सभापतिको हैसियतमा पार्टीको केन्द्रीय समिति बैठकमा सहभागी भएका देउवा शुक्रबार आफू पक्षको राष्ट्रिय भेलामा प्रमुख अतिथि बनेर सार्वजनिक मञ्चमा देखिएका हुन् । पाँच महिनापछि नेपाल फर्किएका देउवाको बिहीबार संस्थापनइतर समूहले भव्य स्वागत गरेको थियो ।

Watch On

गत वर्ष असोज २८ गतेको केन्द्रीय समिति बैठकपछि तत्कालीन उपसभापति पूर्णबहादुर खड्कालाई कार्यवाहक सभापतिको जिम्मेवारी दिइएको थियो । त्यसपछि देउवा पार्टीका औपचारिक कार्यक्रममा देखिएका थिएनन् । जेनजी आन्दोलनका क्रममा उनीमाथि कुटपिट भएपछि सक्रिय राजनीतिक गतिविधिबाट टाढा रहने अनुमान गरिएको थियो ।

यद्यपि, देउवाले निवासमै विभिन्न राजनीतिक भेटघाट भने जारी राखेका थिए । उनले एमाले अध्यक्ष केपी शर्मा ओली, महासचिव शंकर पोखरेल, कांग्रेस (बीपी)का अध्यक्ष सुशीलमान शेरचनलगायत नेतासँग भेट गरेका थिए ।

यसबीच कांग्रेसमा विशेष महाधिवेशनसमेत भयो । पुसमा भएको विशेष महाधिवेशनमा देउवालाई निम्तो गरिए पनि उनी सहभागी भएनन् । त्यसपछि गगन थापा कांग्रेस सभापतिमा निर्वाचित भए । माघमा थापा नेतृत्वको कार्यसमितिलाई निर्वाचन आयोगले मान्यता दिएको थियो ।

त्यसपछि देउवा थप निष्क्रिय देखिएका थिए । उपचारका लागि भन्दै उनी फागुन तेस्रो साता चुनावको मुखैमा सिंगापुर गएका थिए । करिब पाँच महिनापछि नेपाल फर्किएका देउवाको बिहीबार संस्थापनइतर समूहले स्वागत गरेको थियो ।

शुक्रबार राष्ट्रिय भेलामा सहभागी हुँदै देउवा फेरि सार्वजनिक राजनीतिक मञ्चमा देखिएपछि कांग्रेसभित्रको विवादले नयाँ मोड लिएको छ । पार्टीभित्र दुई समूहबीच विवाद चर्किरहेका बेला देउवाको पुनरागमनलाई राजनीतिक रूपमा अर्थपूर्ण मानिएको छ ।

रोचक पक्ष के छ भने गत असोजमा देउवा सभापतिको हैसियतमा सानेपास्थित केन्द्रीय समिति बैठकमा सहभागी हुँदा तत्कालीन महामन्त्री गगनकुमार थापाको समूह पनि उनीसँगै थियो । अहिले भने कांग्रेसकै नाममा देउवा र थापा पक्षले छुट्टाछुट्टै कार्यक्रम गर्नुपर्ने अवस्था बनेको छ ।

शुक्रबारको भेलामा देउवासँग पूर्णबहादुर खड्का, शेखर कोइराला, शशांक कोइराला, कृष्णप्रसाद सिटौला, प्रकाशमान सिंहलगायत नेताहरू एउटै मञ्चमा देखिएका छन् ।

तस्बिर : नेपाल फोटो लाइब्रेरी