१० वर्षमा ८ अर्ब ९६ करोड खर्चंदा कति बन्यो बेनी–जोमसोम–कोरला सडक ?

मुस्ताङ । चीन र भारतलाई जोड्ने त्रिदेशीय बेनी–जोमसोम–कोरला सडकमार्ग निर्माणका लागि पछिल्लो १० वर्षमा ८ अर्ब ९६ करोड रुपैयाँभन्दा बढी खर्च भएको छ ।

कालिगण्डकी करिडोर कोरला सडक योजनाका अनुसार आर्थिक वर्ष २०७३/७४ देखि २०८२/८३ सम्म उक्त रकम खर्च भएको हो । योजनाको साविक लागत अनुमान १० अर्ब ५६ करोड रुपैयाँ रहेकोमा हालसम्म ८ अर्ब ९६ करोड रुपैयाँ खर्च भएको योजना प्रमुख तेजस्वी शर्माले जानकारी दिए ।

Watch On

योजनाको पछिल्लो संशोधित लागत अनुमान भने १५ अर्ब रुपैयाँ पुगेको छ । संशोधित लागतअनुसार बेनी–जोमसोम–कोरला सडकको समग्र भौतिक प्रगति ६५ प्रतिशत र वित्तीय प्रगति ६० प्रतिशत पुगेको छ ।

उत्तर–दक्षिण जोड्ने राष्ट्रिय गौरवको आयोजनाका रूपमा निर्माण भइरहेको कोरला सडकको पछिल्लो संशोधित सम्पन्न अवधि आर्थिक वर्ष २०८८/८९ सम्म कायम गरिएको छ ।

सुरुमा बेनी–जोमसोम ७४ किलोमिटर सडकलाई चार खण्डमा कालोपत्र र जोमसोम–कोरला ११९ किलोमिटर सडकलाई सात खण्डमा ग्राभेल गर्ने गरी आयोजना अघि बढाइएको थियो । पछिल्लो समय सडकसँगै पुल, पहिरो रोकथाम तथा अन्य संरचनाका योजना पनि थपिएका छन् ।

२०२ किलोमिटर सडक कालोपत्र गर्ने लक्ष्य

कोरला सडक योजनाले पर्वतको मालढुङ्गादेखि नेपाल–चीन उत्तरी कोरलानाकासम्मको २०२ किलोमिटर सडक कालोपत्र तथा स्तरोन्नति गर्नुपर्ने लक्ष्य राखेको छ ।

योजनाका अनुसार गत आर्थिक वर्षको असारसम्म मालढुङ्गादेखि कोरलासम्म ९० किलोमिटर सडक कालोपत्र भइसकेको छ ।

मुस्ताङको छुसाङदेखि घमीसम्मको ५० किलोमिटर सडक थप स्तरोन्नति गरी कालोपत्र गर्न दुई अर्ब रुपैयाँभन्दा बढीको ठेक्का आह्वान भइसकेको योजना प्रमुख शर्माले बताए ।

चालु आर्थिक वर्षमा म्याग्दीको सिरुबारीस्थित पहिरोग्रस्त क्षेत्रमा ५०० मिटर सडक कालोपत्रका लागि ठेक्का आह्वान गर्ने तयारी छ । म्याग्दीको राहुघाट जलविद्युत् आयोजना रहेको क्षेत्रमा ३०० मिटर सडक जलविद्युत् कम्पनीले नै कालोपत्र गर्ने पूर्वसहमति भएको छ ।

त्यस्तै, म्याग्दी–मुस्ताङ सीमाक्षेत्र थासाङ–४ घाँसामुनिको खहरे खोलामा करिब ५०० मिटर सडक कालिगण्डकी गर्ज हाइड्रोपावर कम्पनीले कालोपत्र गर्नेछ ।

पर्वतको मालढुङ्गादेखि बेनीसम्मको सडकमा भने करिब ७०० मिटर कालोपत्र गर्न बाँकी रहेको शर्माले बताए ।

२६ पुलमध्ये १८ निर्माण सम्पन्न

कोरला सडक योजनाअन्तर्गत मालढुङ्गादेखि कोरलानाकासम्म २६ वटा पक्की मोटरेबल पुल निर्माण गर्ने लक्ष्य राखिएको छ । आर्थिक वर्ष २०८२/८३ सम्म १८ वटा पुल निर्माण सम्पन्न भइसकेका छन् ।

चारवटा पुल निर्माणाधीन अवस्थामा छन् भने आवश्यक थप चार पुलका लागि बजेट विनियोजन हुन बाँकी छ ।

निर्माण गर्न बाँकी पुलमध्ये मुस्ताङको वारागुङ मुक्तिक्षेत्र–३ स्थित ताङ्वे खोला र वारागुङ मुक्तिक्षेत्र–४ स्थित कागबेनी खोला, म्याग्दीको अन्नपूर्ण गाउँपालिका–३ स्थित रुप्से खोला तथा तातोपानीस्थित भुरुङ खोलाका पुल छन् ।