केही अवाराहरू पार्टी अफिसको क्यान्टिनमा चियासमोसा खाँदै मलाई हटाउन लागेका छन् : ओली

काठमाडौं । नेकपा एमालेका अध्यक्ष केपी शर्मा ओली पुनर्गठन पक्षधरप्रति फेरि आक्रामक बनेका छन् । शनिबार इलाम पुगेका अध्यक्ष ओलीले पुनर्गठनको पक्षमा बोल्नेहरूलाई ‘आवारा’को संज्ञा दिए ।

‘अब उप्रान्त हामीले त्यस्तो कुरा रोक्नु पर्छ । अहिले अनुशासनहीनता देखा परेको छ । अराजकता देखापरेको छ । ख्यालख्याल जस्तो गरेर, पार्टी अफिसको क्यान्टिनमा बसेर केही आवारा.....अध्यक्ष हटाउने कुरा  मानिलिउँ ख्याल हो, ठट्टा हो, जस्तो गरेर...अध्यक्षलाई हटाउने !,’ उनले भने, ‘पार्टी सदस्य छ कि छैन ? उरन्ठेउलाहरू भेला भएको छ । पार्टी अध्यक्ष हटाउने । चिया बनाऊ त बहिनी त्यहाँ भनेको छ । चिया बनाउन लगाएको छ ।  चिया यसो खाएको छ । अलिकति समोसा पनि खाएको छ । अध्यक्ष हटाउने ! कहिले हटाउने हो ? ढिलो भयो, छिटो हटाइदिउँ न । के मजाक हो त्यो ।’

Watch On

उनले यस्तो गतिविधिलाई अराजकताको संज्ञा दिए । एकाथरि हस्ताक्षर गर्दै हिँडेको पनि उनले बताए ।

‘कोही हस्ताक्षर गर्दै हिडेका छन् । यसका पछाडि केही दम छैन । न पार्टीको तरिका न विधान,’ उनले भने ।

गत पुसमा मात्रै महाधिवेशन भएको बताउँदै उनले विशेष महाधिवेशनको सम्भावना पनि नकारे ।

‘अस्ति महाधिवेशन भएको छ । हामी सबैलाई थाहा छ । हामी आफै पनि सहभागी भयौं होला । आफै केन्द्रीय सदस्य छानिएका हौंला । छान्ने थुप्रै हौंला । महाधिवेशनमा । पार्टीको एउटा विधि हुन्छ, प्रक्रिया हुन्छ  । समय हुन्छ, कतिबेला के गर्ने ?’ उनले भने ।

जतिबेला विरोधीले तीव्र प्रहार गरेको छ, पार्टीलाई झेल्न मुल्सिकल भइराखेको छ, त्यतिबेलौ पार्टी एकजुट, एकताबद्ध भएर सामना गर्नुपर्ने ठाउँमा अध्यक्ष हटाउन लागिएको भन्दै उनले रोष प्रकट गरे ।