एमालेभित्र गुटबन्दी गर्ने सानो घेरा रहेको महेश बस्नेतको टिप्पणी

काठमाडौं । नेकपा एमालेका सचिव महेश बस्नेतले पार्टीभित्र दुईखाले प्रवृत्ति रहेको टिप्पणी गरेका छन् । उनले पार्टी र जनताको पक्षमा इमानदारीपूर्वक काम गर्ने आम पंक्ति रहे पनि अर्को सानो घेरा गुटबन्दी र नेतृत्वविरोधी गतिविधिमा लागेको आरोप लगाएका छन् ।

सामाजिक सञ्जालमार्फत आफ्नो धारणा सार्वजनिक गर्दै बस्नेतले एमालेभित्रको एउटा पंक्ति परिभाषित जिम्मेवारी पूरा गर्दै पार्टी र जनताको पक्षमा इमानदारीपूर्वक खटिरहेको बताएका छन् ।

Watch On

तर अर्को सानो घेराले गुटबन्दी गर्ने, ‘खुरापाती’ गर्ने तथा पार्टी र नेतृत्वको विरोध गर्ने गरेको उनको आरोप छ । उनले त्यस्तो समूहलाई व्यंग्य गर्दै पार्टी कार्यालयको चौरको घाँस माड्ने र क्यान्टिनको चियाको कपमा ‘क्रान्तिको आँधीबेहरी’ सिर्जना गर्ने समूहको संज्ञा दिएका छन् ।

अध्यक्ष केपी शर्मा ओलीको पछिल्लो मन्तव्यपछि उक्त समूहका केही व्यक्तिहरू असन्तुष्ट बनेको संकेत गर्दै बस्नेतले उनीहरूप्रति व्यंग्य गरेका छन् ।

‘हिजो अध्यक्षज्यूको मन्तव्यपछि त्यो पंक्तिमा रहेका केही मित्रहरूलाई कुना–काप्चाका लामखुट्टेहरूलाई स्प्रे हानेपछि जस्तै कुइँकुइँ गर्न थालेको सुनिँदैछ,’ उनले लेखेका छन् ।

बस्नेतले अहिलेको आवश्यकता पार्टीभित्र गुट–उपगुट निर्माण गर्नु नभई पार्टीलाई एकताबद्ध, सुदृढ र गतिशील बनाउनु रहेको बताएका छन् ।

‘कुरा काटेर होइन, जनताको पक्षमा काम गर्दै परिवर्तन र समृद्धिको अभियानलाई अगाडि बढ्ने हो,’ उनले भनेका छन् । पार्टीभित्रको आन्तरिक असन्तुष्टि र गुटगत गतिविधिभन्दा जनताको पक्षमा काम गरेर पार्टीलाई थप बलियो बनाउनुपर्ने उनको जोड छ ।