संघर्ष र विद्रोहमा सफल कम्युनिस्टहरू सत्ता सञ्चालनमा किन कमजोर भए? : शंकर पोखरेल

काठमाडौं । नेकपा एमालेका महासचिव शंकर पोखरेलले नेपालका कम्युनिस्टहरू संघर्ष र विद्रोहमा सफल भए पनि राज्यसत्ता सञ्चालनमा भने आमरूपमा कमजोर देखिएको बताएका छन् ।

सामाजिक सञ्जालमार्फत आफ्नो धारणा सार्वजनिक गर्दै पोखरेलले कम्युनिस्ट आन्दोलनमा अधिकार र संघर्षका विषयले प्राथमिकता पाए पनि समाज परिवर्तनको मुख्य आधार ‘अर्थराजनीति’ उपेक्षित भएको विश्लेषण गरेका छन् ।

Watch On

उनले क्रान्तिपूर्व कम्युनिस्ट आन्दोलनले अघि सारेको ‘सरकार शक्ति सञ्चयको आधार हो’ भन्ने मान्यता व्यवहारमा लागू हुन नसकेको बताएका छन् । बरु सरकारमा पुगेपछि आमरूपमा शक्ति क्षयीकरण हुने अवस्था देखिएको उनको भनाइ छ ।

कम्युनिस्ट पार्टीको नेतृत्वमा सरकार बनेका बेला देशभक्ति, पूर्वाधार विकास र सामाजिक सुरक्षाका क्षेत्रमा उल्लेख्य काम भए पनि त्यसअनुसार जनसमर्थन भने बढ्न नसकेको पोखरेलले उल्लेख गरेका छन् ।

उनले २०५१ सालको मनमोहन अधिकारी नेतृत्वको अल्पमतको सरकार र २०७२ सालमा केपी शर्मा ओली नेतृत्वको नौमहिने वामपन्थी सरकारबाहेक अन्य कुनै पनि वामपन्थी नेतृत्वको सरकारले आफ्नो जनमत बढाउन नसकेको दाबी गरेका छन् ।

आम निर्वाचन २०८२ मा सिंगो वामपन्थी आन्दोलनले बेहोरेको ‘असाधारण धक्का’ ले वाम तथा कम्युनिस्ट आन्दोलनबारे नयाँ ढंगले चिन्तन र मनन गर्नुपर्ने अवस्थामा पुर्‍याएको पोखरेलको भनाइ छ ।

उनले कम्युनिस्ट पार्टीको नेतृत्वमा सरकार हुँदा आधारभूत वर्ग र समुदायका जनता नै पार्टीबाट किन टाढिए भन्ने प्रश्नको गम्भीर समीक्षा गर्नुपर्ने बताएका छन् । साथै नेता तथा कार्यकर्तामा सामाजिक परिवर्तनप्रतिको ‘हुटहुटी’ किन शिथिल भयो भन्ने विषयमा पनि निर्मम समीक्षा आवश्यक रहेको उनको भनाइ छ ।

‘यस्तो अवस्थामा कम्युनिष्ट पार्टीको नेतृत्वमा सरकार हुँदा आधारभूत वर्ग र समुदायका जनता नै कम्युनिष्ट पार्टीसँग किन टाढिए? किन नेता र कार्यकर्तामा सामाजिक परिवर्तनप्रतिको हुटहुटी शिथिल भयो?’ पोखरेलले प्रश्न गरेका छन् ।

यस्ता विषयमा निर्मम समीक्षा नगरी कम्युनिस्ट आन्दोलनको पुनर्जागरण सम्भव नहुने उनले बताएका छन् ।

समस्याबाट भाग्नुभन्दा त्यसको कारण पहिल्याएर समाधानतर्फ अघि बढ्नुपर्नेमा जोड दिँदै पोखरेलले हरेक समस्याको पछाडि कुनै न कुनै कारण हुने र समाधान पनि त्यहीँ निहित हुने मार्क्सवादी मान्यता रहेको उल्लेख गरेका छन् ।

‘तसर्थ समस्या छ भनेर भाग्ने होइन, सामना गरेर अघि बढ्ने हो,’ उनले भनेका छन् ।