आलोचना दबाएर एमाले बलियो हुँदैन : शम्भु शाह

काठमाडौं । नेकपा एमालेका नेता शम्भु शाहले पार्टीभित्र आलोचना र असहमतिका आवाजलाई ‘गुटबन्दी’, ‘खुरापाती’ र ‘अराजकता’का रूपमा चित्रण गरेर दबाउन खोजिएको भन्दै नेतृत्वको आलोचना गरेका छन् ।

सामाजिक सञ्जालमार्फत आफ्नो धारणा सार्वजनिक गर्दै शाहले एमालेभित्र अहिले दुई प्रवृत्ति देखिएको बताएका छन् । उनका अनुसार एउटा प्रवृत्ति व्यक्तिगत सत्ता, परिवारवाद र गुटको संरक्षण गर्दै आफूलाई मात्र ‘पार्टीको पक्ष’ ठान्ने समूह हो भने अर्को प्रवृत्ति पार्टीका कमजोरी, असफलता र नेतृत्वको स्वेच्छाचारितामाथि प्रश्न उठाउँदै सुधार, लोकतान्त्रिक अभ्यास र वास्तविक एकताको माग गर्ने आम नेता–कार्यकर्ता हुन् ।

Watch On

इलाममा आयोजित कार्यक्रममा पार्टी अध्यक्ष केपी शर्मा ओलीले पुनर्गठनको माग गर्ने पार्टीभित्रकै नेताहरूलाई ‘अनुशासनहीन’, ‘अराजक’ र ‘आवारा’ भनेर टिप्पणी गरेको भन्दै शाहले त्यसप्रति आपत्ति जनाएका छन् ।

असहमत स्वरलाई संस्थागत बहसका रूपमा लिनुको सट्टा व्यक्तिगत टिप्पणी र गालीमा परिणत गर्ने शैली नेतृत्वको पुरानो राजनीतिक संस्कृति भएको शाहको आरोप छ ।

उनले पार्टीभित्रको आन्तरिक आलोचना र असहमतिलाई दबाउँदा पार्टी बलियो नभई झन् कमजोर हुने बताएका छन् ।

‘आन्तरिक आलोचना सहन नसक्ने नेतृत्वले अब बाह्य दबाब धान्न सक्दैन,’ शाहले लेखेका छन् ।

पार्टी कार्यालयको क्यान्टिनमा हुने छलफललाई समेत उपहास गरिएको भन्दै उनले क्यान्टिन केवल खाजा खाने ठाउँ नभएको बताएका छन् । पार्टीभित्र लोकतन्त्र र जवाफदेहिता जीवित राख्न खोज्ने कार्यकर्तालाई ‘क्यान्टिनको आवारा’ भनेर उपहास गर्नु नेतृत्वको कमजोरीको संकेत भएको उनको तर्क छ ।

शाहले एमालेभित्र अहिलेको मुख्य मुद्दा पुनर्गठन भएको दाबी गरेका छन् । पुनर्गठनको माग र असहमतिलाई दबाउने, कार्यदलको समीक्षा प्रतिवेदन सार्वजनिक नगर्ने तथा पुनर्गठनका पक्षधरलाई ‘विरोधी’ करार गर्ने प्रवृत्ति नै वास्तविक गुटबन्दी भएको उनको आरोप छ ।

जनताको पक्षमा काम गर्न नेतृत्वले आफ्नो कार्यशैली, संगठनको अवस्था र चुनावी परिणामको इमानदार समीक्षा गर्न सक्नुपर्ने शाहले बताएका छन् ।

‘महराज, अब तपाईंको छुद्र बोलीले पार्टी बन्दैन,’ उनले अध्यक्ष ओलीलाई सम्बोधन गर्दै लेखेका छन् ।

पार्टीको नेतृत्व हस्तान्तरण गरेर सहज वातावरण निर्माण गर्नसमेत शाहले आग्रह गरेका छन् ।

‘हस्तान्तरण गरेर सहज गरिबक्सियोस्,’ उनले भनेका छन् ।