बाढीपहिरोबाट भएको जनधनको क्षतिप्रति एमालेद्वारा दुःख व्यक्त

काठमाडौं । अविरल वर्षाका कारण देशका विभिन्न भागमा बाढीपहिरोबाट भएको जनधनको क्षतिप्रति नेकपा (एमाले)ले गहिरो दुःख व्यक्त गरेको छ ।

एमालेले प्राकृतिक प्रकोपमा परी ज्यान गुमाउनेहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा समवेदना व्यक्त गरेको छ । साथै, घाइतेहरूको शीघ्र स्वास्थ्यलाभको कामना गरेको छ ।

Watch On

एमालेका अनुसार जाजरकोट, रोल्पा, बाजुरा, कास्कीलगायत विभिन्न जिल्लामा बाढी, पहिरो तथा सडक अवरोधका कारण ठूलो संख्यामा मानवीय तथा भौतिक क्षति भएको छ । सडक अवरुद्ध हुँदा सर्वसाधारणको आवागमनसमेत प्रभावित भएको एमालेले जनाएको छ ।

जाजरकोटको भेरी नगरपालिका–२, रिसाङमा गएको पहिरोमा परी चार जनाको मृत्यु भएको तथा एक जना अझै बेपत्ता रहेको एमालेको विज्ञप्तिमा उल्लेख छ । पहिरोमा परी घाइते भएका ५२ वर्षीय केदार कार्कीको उपचारका क्रममा मृत्यु भएको थियो । बेपत्तामध्ये ५४ वर्षीया उमासिंह खत्री, ७० वर्षीय भमीबहादुर कार्की र ८३ वर्षीया रति खत्रीको शव फेला परेको तथा १४ वर्षीय हरिस विक अझै बेपत्ता रहेको जनाइएको छ । घटनामा सात जना घाइते भएका छन् भने आठ वटा घरमा क्षति पुगेको छ ।

रोल्पामा गएको साता भएको भीषण पहिरोमा १७ जनाको मृत्यु भएको एमालेले जनाएको छ । पछिल्लो समय सुनछहरी गाउँपालिका–२, फलबाङमा बिहीबार राति पहिरोले घर पुरिँदा घरधनी वीरबहादुर घर्तीमगर, उनकी श्रीमती शनी घर्तीमगर र घरमा बास बस्न आएकी छिमेकी लली घर्तीमगर बेपत्ता भएका छन् ।

त्यस्तै, पोखरा महानगरपालिका–१४ स्थित विजयबस्तीबाट विजयपुर खोला तरेर पोखरा–२६ सक्नेरीतर्फ जाने क्रममा भगवती हाइड्रोपावर नजिक खोलाले बगाउँदा १४ वर्षीय निकसन गुरुङ र १५ वर्षीय ओमन राई बेपत्ता भएका छन् ।

अविरल वर्षाका कारण आएको बाढीपहिरो र हिलोले देशका प्रमुख सडकको आवागमनसमेत प्रभावित भएको एमालेले जनाएको छ । बिपी राजमार्ग, कान्ति लोकपथ, मेची राजमार्ग, अरनिको राजमार्ग, जाजरकोट–डोल्पा सडक, मध्यपहाडी लोकमार्ग र सहिद मार्ग पहिरो तथा भूस्खलनका कारण पूर्णरूपमा बन्द भएको एमालेको भनाइ छ ।

एमालेले बाढीपहिरोबाट बेपत्ताको खोजी, पीडितको उद्धार तथा राहत र सडक सञ्चालनको काम तीव्र बनाउन सरकारको गम्भीर ध्यानाकर्षण गराएको छ । साथै, स्थानीय तह र सुरक्षाकर्मीसँग समन्वय गरी उद्धार, राहत तथा सडक सञ्चालनका काममा जुट्न स्थानीय पार्टी कमिटी र कार्यकर्तालाई आह्वान गरेको छ ।