पुनर्गठनको नाममा अध्यक्ष फेर्ने गतिविधि सह्य हुँदैन : ओली

झापा । नेकपा एमालेका अध्यक्ष केपी शर्मा ओलीले पार्टीभित्र पुनर्गठनको माग गर्दै नेतृत्व परिवर्तनका लागि भइरहेको गतिविधिप्रति असन्तुष्टि जनाउँदै त्यस्ता गतिविधि स्वीकार्य नहुने बताएका छन् । उनले सामाजिक सञ्जालमा स्टाटस लेख्ने वा हस्ताक्षर अभियान चलाएर पार्टी अध्यक्ष हटाउने प्रयास गर्नु अराजक शैली भएको टिप्पणी गरेका छन् ।

झापा एमालेले आयोजना गरेको ‘मिसन पार्टी जागरण अभियान’को उद्घाटन गर्दै ओलीले पार्टीभित्र नेतृत्व परिवर्तनको विषय उठाउने नाममा अनुशासनविपरीत गतिविधि नगर्न चेतावनी दिएका हुन् ।

Watch On

‘सामाजिक सञ्जालमा स्टाटस लेखेर अध्यक्ष हटाउने ? हस्ताक्षर क्याम्पेन गरेर अध्यक्ष हटाउने ? पार्टीमा यस्तो शैली सह्य हुँदैन,’ ओलीले भने ।

‘एमाले अहिले पुनर्गठन होइन, पुनर्जागरणको अवस्थामा छ’

ओलीले एमाले अहिले पुनर्गठनको अवस्थामा नरहेको दाबी गर्दै पार्टी ‘पुनर्जागरण’को चरणमा रहेको बताए । नेतृत्व परिवर्तनलाई मात्रै पुनर्गठनको अर्थमा बुझ्न नहुने उनको तर्क छ ।

‘आज पुनर्गठन होइन, पुनर्जागरणको अवस्थामा छौँ,’ उनले भने ।

पार्टीभित्र हुने नियमित अधिवेशन तथा कमिटी पुनर्संरचनालाई सिंगो पार्टीको पुनर्गठन भन्न नमिल्ने ओलीको भनाइ छ । कुनै जनसंगठन वा कमिटीको पुनर्गठन हुन सक्ने भए पनि त्यसलाई सिंगो पार्टीको पुनर्गठनका रूपमा व्याख्या गर्न नहुने उनले बताए ।

‘अहिले पार्टी पुनर्गठन जो भनिएको छ, वास्तवमा पुनर्गठन होइन । कुनै जनसंगठनको होला, सिंगै पार्टीको पुनर्गठन होइन । कुनै कमिटीको होला । त्यस्तो व्यापक रूपमा भइरहन्छ । अधिवेशनहरू गरिरहन्छौँ, पुनर्गठन हुँदैन,’ ओलीले भने ।

उनले विगतका पार्टी अध्यक्षहरूको उदाहरण दिँदै नेतृत्व परिवर्तन मात्र पुनर्गठन नभएको बताए । उनका अनुसार पार्टीको नीति, गन्तव्य र कार्यक्रममै परिवर्तन ल्याउने प्रक्रिया नै वास्तविक पुनर्गठन हो ।

‘विगतमा पनि मलाई हटाउने प्रयास भए’

आफ्नो नेतृत्वमाथि प्रश्न उठाइरहेका नेताहरूलाई जवाफ दिने क्रममा ओलीले विगतमा पनि आफूविरुद्ध पार्टीभित्र पटक–पटक गतिविधि भएको स्मरण गरे ।

उनले २०२९ देखि २०३२ सालसम्म सीपी मैनालीलगायतका नेताहरूले आफूलाई पार्टी सदस्यताबाटै वञ्चित गरेको दाबी गरे ।

त्यसैगरी २०७७ सालमा पुष्पकमल दाहाल ‘प्रचण्ड’ र माधवकुमार नेपाल पक्षले आफूलाई पार्टीबाट निष्कासन गरेको प्रसंग पनि उनले सुनाए । ती सबै अवस्थामा आफूले पार्टीलाई जोगाउँदै अघि बढेको ओलीको दाबी थियो ।

आफ्नो नेतृत्वमा पार्टीले हासिल गरेका उपलब्धि र विगतका राजनीतिक घटनाक्रमको लामो चर्चा गर्दै ओलीले नेतृत्व परिवर्तनको माग गर्नेहरूले ती पक्षलाई पनि ध्यान दिनुपर्ने संकेत गरे ।

‘सदस्यभन्दा कम भोट आयो, सुन्दा लाज हुन्छ’

ओलीले पार्टी सदस्यको भूमिकामाथि पनि प्रश्न उठाएका छन् । एमालेका सदस्य संख्या र निर्वाचनमा पार्टीले प्राप्त गरेको मतबीचको अन्तरप्रति उनले असन्तुष्टि जनाए ।

‘हाम्रो पार्टीमा सदस्यभन्दा कम भोट आयो । सुन्दा लाज हुन्छ,’ ओलीले भने, ‘कस्तो सदस्य ?’

उनले पार्टीको सदस्यता नवीकरण गर्दा पार्टीलाई मत नदिने व्यक्तिका विषयमा समेत गम्भीर हुन निर्देशन दिए ।

‘सदस्यको नवीकरण गर्नुस्, गैरसदस्यको होइन,’ ओलीले भने, ‘नयाँ सदस्य थप्नुस् ।’

‘खानेहरूले गुनासो गरे, नपाउनेले पनि भोट हाले’

ओलीले पार्टीभित्र अवसर र जिम्मेवारी पाएका केही नेताहरूबाटै असन्तुष्टि व्यक्त भइरहेको भन्दै आलोचना गरे ।

‘पर्याप्त खान पाएकाहरूले गुनासो गरेका छन्,’ उनले भने, ‘केही नपाएकाले यसपटक पनि भोट हाले । केही पाएकाले यसपटक पनि भोट हालेनन् ।’

पार्टीबाट लाभ लिएर पनि पार्टीप्रति असन्तुष्टि जनाउनेहरूलाई उनले ‘किर्ना’को संज्ञा दिए । पार्टीलाई कमजोर बनाउने प्रवृत्तिमाथि व्यंग्य गर्दै ओलीले भने, ‘एमालेलाई पनि भैंसी बनाउन खोजेका छन् साथीहरूले ।’

‘एमालेमा लोकतन्त्र जीवित छ’

पार्टीभित्र लोकतन्त्र नरहेको भन्ने आरोपको समेत ओलीले खण्डन गरे । उनले एमालेमा सबैका कुरा सुन्ने गरिएको र आफूले समेत फरक मत तथा आलोचना सुन्ने गरेको दाबी गरे ।

‘मैले जिन्दगीमा अहिलेसम्म कडा वचन, कडा स्वर कहिले प्रयोग गरेको छैन,’ ओलीले भने ।

पार्टीभित्र आफूले नेता–कार्यकर्तालाई हप्काउने गरेको भन्ने प्रचारप्रति पनि उनले असन्तुष्टि जनाए । कसैलाई हप्काउने वा पार्टीमा कसैलाई मालिक र कसैलाई दासका रूपमा व्यवहार गर्ने पक्षमा आफू नरहेको उनले स्पष्ट पारे ।

‘कसैलाई हप्काउन पाइँदैन । कोही मालिक र कोही दास छैन,’ ओलीले भने ।

ओलीको पछिल्लो अभिव्यक्तिले एमालेभित्र पछिल्लो समय उठिरहेको पुनर्गठन, नेतृत्व हस्तान्तरण, आन्तरिक लोकतन्त्र र संगठनात्मक सुधारसम्बन्धी बहसलाई थप सतहमा ल्याएको छ । पार्टीभित्रै केही नेताहरूले पुनर्गठन र नेतृत्व हस्तान्तरणको माग गरिरहेका बेला अध्यक्ष ओलीले भने नेतृत्व परिवर्तनको मागलाई अस्वीकार गर्दै पार्टी अहिले ‘पुनर्जागरण’को चरणमा रहेको धारणा राखेका हुन् ।