पायक पर्ने विक्रेताबाटै ग्यास किन्न निगमको आग्रह

काठमाडौँ । नेपाल आयल निगमले उपभोक्तालाई आफूलाई पायक पर्ने ग्यास विक्रेतामार्फत खाना पकाउने एलपी ग्यास खरिद गर्न आग्रह गरेको छ । 

निगमले २०८३ भदौ १ गते सोमबारदेखि सम्बन्धित ग्यास उद्योगले नियुक्त गरेका विक्रेतामार्फत नियमित प्रक्रियाअनुसार ग्यास बिक्री वितरणको व्यवस्था मिलाइएको जनाएको छ ।

Watch On

उपभोक्ताले आफूलाई पायक पर्ने ग्यास विक्रेतासँग सम्पर्क गरी ग्यास खरिद गर्न निगमले आग्रह गरेको हो । ग्यासको बिक्री वितरणलाई व्यवस्थित एवं प्रभावकारी बनाउन निगमले ग्यास उद्योग र विक्रेताका लागि विभिन्न व्यवस्था लागू गरेको जनाएको छ ।

निगमका अनुसार ग्यास उद्योगहरूले दैनिक बिक्री गर्ने विक्रेता तथा वितरकको नाम, ठेगाना, सम्पर्क नम्बर र बिक्री गरिएका सिलिन्डरको संख्यासहितको विवरण प्रत्येक दिन बिहान ९ बजेभित्र निगममा उपलब्ध गराउनुपर्नेछ ।

त्यसैगरी ग्यास विक्रेता तथा वितरकले बिक्री गरेको ग्यासको परिमाण, उपभोक्ताको नाम र सम्पर्क नम्बरसहितको विवरण दैनिक रूपमा तयार गरी सम्बन्धित ग्यास उद्योगलाई अनिवार्य रूपमा उपलब्ध गराउनुपर्नेछ । सम्बन्धित उद्योगले उक्त विवरण सोही दिन नेपाल आयल निगममा उपलब्ध गराउनुपर्ने निगमले जनाएको छ ।

निगमले अत्यावश्यक घरेलु प्रयोजनका लागि ग्यास प्रयोग गर्ने उपभोक्तालाई उच्च प्राथमिकतामा राखेर बिक्री वितरण गर्नसमेत निर्देशन दिएको छ ।

ग्यासको ढुवानी तथा वितरणका क्रममा सुरक्षाको दृष्टिले आवश्यक सहजीकरणका लागि सम्बन्धित जिल्ला प्रशासन कार्यालयलाई गृह मन्त्रालयमार्फत अनुरोध गरिएको निगमले जनाएको छ ।

त्यस्तै, वाणिज्य, आपूर्ति तथा उपभोक्ता संरक्षण विभागसँग समन्वय गरी निगमबाट खटिएका जनशक्तिसहितको संयुक्त टोलीमार्फत ग्यास वितरण कार्यको अनुगमन गर्ने व्यवस्था मिलाइएको छ ।

नजिकको विक्रेताबाट कुनै कारणवश ग्यास प्राप्त गर्न नसकेका तथा तत्काल अत्यावश्यक परेका उपभोक्ताले निगममा सञ्चालनमा रहेको क्विक रेस्पोन्स टिम (क्यूआरटी) मा सम्पर्क गर्न सक्नेछन् ।

निगमले क्यूआरटीका लागि ९८५१४५५१२४ र ९८५१४५५१२८ नम्बरमा सम्पर्क गर्न आग्रह गरेको छ ।

बजारमा एलपी ग्यासको अभाव देखिएपछि निगमले बिक्री वितरण प्रणालीलाई व्यवस्थित बनाउन यस्तो व्यवस्था गरेको हो । निगमले उपभोक्तालाई अनावश्यक रूपमा ग्यास सञ्चय नगर्न र पायक पर्ने विक्रेताबाट नियमित प्रक्रियाअनुसार ग्यास खरिद गर्नसमेत आग्रह गरेको छ ।