पर्यटन बोर्डले भन्यो– भोटेकोशी बाढीमा ३८४ पर्यटक सम्पर्कविहीन नै छन्

काठमाडौँ । रसुवाको भोटेकोशी नदीमा बुधबार बिहान आएको बाढीपछि ३८४ पर्यटक सम्पर्कविहीन भएका छन्।

Watch On

नेपाल पर्यटन बोर्डका अनुसार सम्पर्कविहीन हुनेमा २९१ विदेशी र ९३ नेपाली पर्यटक छन्। विभिन्न कम्पनीमार्फत गोसाइँकुण्ड तथा कैलाश मानसरोवर भ्रमणमा गएका उनीहरूको अवस्था अझै पत्ता लाग्न नसकेको बोर्डले जनाएको छ।

नेपाल पर्यटन बोर्डका निमित्त प्रमुख कार्यकारी अधिकृत (सिइओ) हिक्मतसिंह ऐरले विभिन्न ट्राभल तथा ट्रेकिङ कम्पनीमार्फत भ्रमणमा गएका ३८४ पर्यटक सम्पर्कविहीन भएको जानकारी दिनुभयो।

बोर्डका अनुसार सम्राट टुर्स एण्ड ट्राभलमार्फत ७१ जना, काठमाडौँ होलिडे टुर्स एण्ड ट्राभलमार्फत १७ जना, लिफ होलिडेमार्फत ५५ जना, कैलाश जर्नीमार्फत ३१ जना, एक्सप्लोर भ्याकेशनमार्फत सात जना र ट्रेकर सोसाइटीमार्फत ९२ जना भ्रमणमा गएका थिए।

यस्तै, रिचा टुर्स एण्ड ट्राभलमार्फत १२ जना, फिस्टेल टुर्स एण्ड ट्राभलमार्फत २७ जना, हिमालयन ग्लासियरमार्फत ५२ जना र अल्पाइन इको ट्रेकमार्फत २० जना भ्रमणमा रहेको बोर्डले जनाएको छ।

बाढी प्रभावित क्षेत्रमा रहेका पर्यटकको अवस्था पत्ता लगाउन पर्यटन प्रहरी, स्थानीय प्रशासन तथा सुरक्षा निकाय परिचालन गरिएको छ।

भोटेकोशी बाढीले रसुवाको टिमुरे र स्याफ्रुबेँसी क्षेत्रका बस्ती, प्रहरी चौकी तथा भन्सार कार्यालयमा ठूलो क्षति पुर्‍याएको छ। बाढीका कारण रसुवागढी नाका जोड्ने सडक तथा पुलमा समेत क्षति पुगेको छ।

पर्यटकको अवस्था तथा उद्धारसम्बन्धी जानकारी वा सहयोगका लागि नेपाल पर्यटन बोर्डले टोल फ्रि नम्बर १२३४, हटलाइन ११४४ तथा पर्यटन प्रहरी ९८५१२८९४४५ मा सम्पर्क गर्न आग्रह गरेका छन् ।