भारतबाट आइसक्यो, चीनबाट पनि आउँदैछ उद्धार टोली

काठमाडौँ । सरकारले सुरुङमा फसेका मानिसहरुको उद्धारका लागि भारतबाट प्राविधिक टोली आइसकेको र चीनबाट पनि विशेषज्ञ टोली आउँदै गरेको जनाएको छ ।

Watch On

परराष्ट्रमन्त्री शिशिर खनालले आज पत्रकार सम्मेलन गरी भारतबाट आएको ११ सदस्यीय प्राविधिक टोली प्रभावित क्षेत्रमा परिचालित भइसकेको र चीनबाट पनि उद्धार टोली छिट्टै आइपुग्ने बताएका हुन् ।

उनले छिमेकी देशहरुसँग फोरेन्सिक जाँच तथा शव व्यवस्थापनका लागि समेत विशिष्ट प्राविधिक सहयोगका लागि आग्रह गरिएको जानकारी दिए ।

मन्त्री खनालले सुरुङभित्र फसेकाहरूको उद्धारका साथै जीवित व्यक्ति पत्ता लगाउने प्रविधि, फोरेन्सिकजाँच तथा शव व्यवस्थापनका लागि छिमेकी मित्रराष्ट्रहरूसँग विशिष्ट प्राविधिक सहयोग मागरिएको जानकारी दिए । 

मन्त्री खनालले भारतबाट ५७ टनभन्दा बढी राहत सामग्री प्राप्त भइसकेको र चीन, जापान, अस्ट्रेलिया लगायतका देशहरूबाट आवश्यक सामाग्रीहरू आउने क्रम जारी रहेको उल्लेख गरे । अन्तर्राष्ट्रिय दूतावासहरूसँग समन्वय गरी पर्यटकका परिवारलाई सूचना दिने र शव पहिचान तथा फिर्ता पठाउने प्रक्रिया सहज बनाइएको पनि बताए । 

मन्त्री खनालले पानी जमेर बनेको ताल र त्यसबाट हुनसक्ने सम्भावित जोखिमबारे दुवै देशको प्राविधिक समन्वयमा निरन्तर निगरानी भइरहेको जानकारी दिए । 

बाढीको प्रभाव निश्चित क्षेत्रमा मात्र सीमित रहेकाले नेपालका अधिकांश प्रमुख पर्यटकीय गन्तव्यहरू पूर्णतः सुरक्षित र खुला रहेको उनको भनाइ छ ।