रसुवाको भोटेकोशी बाढीमा मृत्यु हुनेको संख्या ७३४ पुग्यो, २ हजार ४१८ सम्पर्कविहीन

काठमाडौं । रसुवाको भोटेकोशीमा आएको बाढीबाट मृत्यु हुनेको संख्या ७३४ पुगेको छ । 

Watch On

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार भदौ १४ गते बिहान ९ बजेसम्म विभिन्न जिल्लामा बाढीमा परी मृत्यु भएका ७३४ जनाको शव फेला परेको हो ।

प्राधिकरणका अनुसार चितवनमा सबैभन्दा धेरै २५९ जनाको मृत्यु भएको छ । यस्तै नवलपरासी पूर्वमा १८४, नवलपरासी पश्चिममा ८२, गोरखामा ५८, नुवाकोटमा ५२, धादिङमा ५०, तनहुँमा ३६ र रसुवामा १३ जनाको मृत्यु भएको छ । चितवनमा फेला परेका शवमा विभिन्न मानव अंगसमेत रहेको जनाइएको छ ।

बाढीपछि २ हजार ४१८ जना अझै सम्पर्कविहीन रहेको विवरणमा उल्लेख  छ । सम्पर्कविहीन हुनेमा नेपाल प्रहरीका २७, नेपाली सेनाका ४५, सशस्त्र प्रहरी बलका १३, भन्सार कार्यालयका १५ र अध्यागमन कार्यालयका चार जना छन् ।

यस्तै रसुवाका ५६२, नुवाकोटका ११५, मकवानपुरका ६५ तथा जलविद्युत् आयोजनासँग सम्बन्धित १३३ जना सम्पर्कविहीन रहेको प्राधिकरणले जनाएको छ । त्यसैगरी ५८९ विदेशी नागरिक, विदेशी पर्यटकसँगै घुम्न गएका १२७ नेपाली र लाङटाङ राष्ट्रिय निकुञ्जका तीन जना पनि सम्पर्कविहीन छन् ।

बाढीबाट २४२ जना घाइते भएका छन् । उनीहरूमध्ये उपचाररत तथा उपचारपछि डिस्चार्ज भएकाहरू समावेश छन् । प्रभावित क्षेत्रमा सर्जिकल मेडिकल टिमसमेत परिचालन गरिएको छ ।

खोज तथा उद्धारका लागि नेपाल प्रहरी, नेपाली सेना र सशस्त्र प्रहरी बल नेपालका गरी १९ हजार ८९५ सुरक्षाकर्मी परिचालन गरिएको छ । जसमा नेपाल प्रहरीका ७ हजार २९३, नेपाली सेनाका ८ हजार ३९९ र सशस्त्र प्रहरी बलका ४ हजार २०३ जना छन् ।

हालसम्म ८ हजार १८६ जनाको उद्धार गरिएको छ । उद्धार गरिएकामध्ये नेपाली सेनाले २ हजार ९७४, नेपाल प्रहरीले २ हजार ६९९ र सशस्त्र प्रहरीले २ हजार ५१३ जनाको उद्धार गरेका छन् ।

जलविद्युत् आयोजनाको सुरुङमा फसेकाहरूको समेत हेलिकप्टरमार्फत उद्धार गरिएको छ । भदौ १२ गते १९१ र भदौ १३ गते ८८ गरी २७९ जनालाई हेलिकप्टरबाट उद्धार गरिएको प्राधिकरणले जनाएको छ । हालसम्म २२७ विदेशी नागरिकको हेलिकप्टरबाट उद्धार गरिएको छ ।