बाढी प्रभावित क्षेत्रमा उच्च गतिको नि:शुल्क इन्टरनेट उपलब्ध गराउने स्टारलिङ्कको प्रस्ताव

काठमाडौँ । इलोन मस्कको स्पेसएक्सद्वारा सञ्चालित स्टारलिङ्कले भोटेकोशी बाढी प्रभावित क्षेत्रमा नि:शुल्क  इन्टरनेट सेवा उपलब्ध गराउने प्रस्ताव गरेको छ । 

Watch On

स्याटलाइटमा आधारित इन्टरनेट सेवा दिँदै आएको  स्टारलिङ्कले  नेपाल सरकार र मानवीय सहायता संस्थाहरूलाई स्याटेलाइट इन्टरनेट किट उपलब्ध गराउने र नि:शुल्क सेवा प्रदान गर्ने प्रस्ताव गरेको हो ।

विपद्बाट प्रभावित समुदायहरूप्रति ऐक्यबद्धता जनाउँदै स्टारलिङ्कले सडक, पुल र परम्परागत मोबाइल सञ्जालहरू क्षतिग्रस्त वा अवरुद्ध भएका क्षेत्रहरूमा महत्त्वपूर्ण सञ्चार सेवा पुनःस्थापना गर्न आफ्नो सेवाले मद्दत पुर्‍याउने बताएको छ ।

'यस हप्ताको विनाशकारी बाढीपछि हाम्रो सहानुभूति नेपाल र तिब्बत सीमाक्षेत्रका बासिन्दाहरूसँग छ,' कम्पनीले भनेको छ।

स्टारलिङ्कका अनुसार, स्याटेलाइट कनेक्टिभिटीले खोजी कार्यमा खटिएका उद्धार टोली, घाइतेहरूको उपचारमा संलग्न स्वास्थ्यकर्मी र बेपत्ता वा सम्पर्कविहीन भएका आफन्तहरूसँग सम्पर्क प्रयास गरिरहेका परिवारहरूलाई सहयोग पुर्‍याउन सक्छ ।

कम्पनीकाअनुसार, ऊर्जाको स्रोत (बिजुली) र आकाश प्रस्ट देखिने स्थान उपलब्ध भएमा यसको स्याटेलाइट इन्टरनेट किटले केही मिनेटभित्रै उच्च गतिको, कम ढिलाइ हुने इन्टरनेट सेवा चालू गर्न सक्छ ।

परम्परागत भू-आधारित (स्थलीय) इन्टरनेट पूर्वाधारको तुलनामा स्याटेलाइटमा आधारित प्रणालीहरू विपद्का बेला विशेष गरी उपयोगी हुन्छन्, जब मोबाइल टावर, फाइबर-अप्टिक नेटवर्क र अन्य सञ्चार पूर्वाधारहरू क्षतिग्रस्त भएका हुन्छन् ।

नेपाली अधिकारीहरूबाट आवश्यक अनुमति पाउनासाथ उपकरणहरू पठाउन र नि:शुल्क इन्टरनेट सेवा सुरु गर्न आफू तयार रहेको स्टारलिङ्कले जनाएको छ ।