नारायणीमा भेटिँदै छन् भोटेकोशीले बगाएका शव

चितवन । रसुवामा आएको बाढीपछि बेपत्ता भएका धेरैको शव चितवन, नवलपरासी (बर्दघाट सुस्ता पूर्व), नवलपरासी (बर्दघाट सुस्ता पश्चिम)मा पर्ने नारायणी नदीमा भटिइरहेको छ ।

Watch On

हालसम्म बाढीमा परेका ९ सय ३ जनाको शव भेटिएकोमा तल्लो तटीय क्षेत्रका तीन वटा जिल्लामा मात्र ६ सय ३० शव भेटिएका छन् । सरकारले सार्वजनिक गरेको पछिल्लो विवरणअनुसार चितवनमा २ सय ७२, नवलपरासी (बर्दघाट सुस्ता पूर्व)मा २ सय ७, नवलपरासी (बर्दघाट सुस्ता पश्चिम)मा १ सय ५१ शव फेला परेको छ ।

बाढीबाट धेरै प्रभावित रसुवा, नुवाकोट क्षेत्रमा उद्धारको काममा जोड दिइएको छ । खोजी तीव्र पारिएको र तल्लो तटीय क्षेत्रमा बाढीको बहाब कम भएकाले धेरै शव नारायणीमा भेटिन थालेका हुन् । कतिपय शव भारतसम्म पुगेका छन् ।

चितवन र आसपास शव खोज्न नेपाली सेना सक्रिय छ । नेपाली सेनाले चितवनस्थित नारायणी नदी र आसपासका क्षेत्रमा खोज तथा उद्धार कार्यलाई तीव्रता दिएको छ । 

मध्य पृतनाको नेतृत्वमा गठित टास्क फोर्सअन्तर्गत नेपाली सेनाका विभिन्न युनिटले जिम्मेवारीअनुसार क्षेत्र विभाजन गरी बेपत्ताको खोजी गरिरहेका छन् । नयाँ गोरख गण र नयाँ सबुज गणले संयुक्त रूपमा नारायणी नदी तथा आसपासका क्षेत्रमा खोजी तथा उद्धार अभियान सञ्चालन गरेका छन् ।

खोजी अभियानमा संहनाथ गणको कमाण्डो तालिमप्राप्त टोलीसमेत परिचालन गरिएको छ । उक्त टोलीले नारायणी नदीका जोखिमपूर्ण तथा कठिन भू–भागमा खोजी गरिरहेको नेपाली सेनाले जनाएको छ । 

सोमबार बिहान ५ बजेदेखि निरन्तर सञ्चालन गरिएको खोजीका क्रममा सोमबार दिउँसो २ बजेसम्म नगर वन टापु क्षेत्रमा १० वटा शव फेला परेका छन् । त्यस्तै, सोही क्षेत्रमा थप दुई शवका अवशेषसमेत फेला परेको सेनाले जनाएको छ ।

चितवनमा बेपत्ताको खोजी गर्न ड्रोन, वाटर रबरबोटको सहयोगमा ४ सय ३६ जनाको संयुक्त टोली परिचालित छ ।–नेपाल फोटो लाइब्रेरी