आज कुन कुन हाइड्रोको सुरुङमा उद्धार प्रयास भइरहेको छ ?

काठमाडौँ । नेपाली सेनाले आज दिनभरमा बाढी प्रभावित क्षेत्रबाट १०९ जनाको उद्धार गरिएको जनाएको छ । सेनाका अनुसार आज एक जर्मन नागरिक सहित १०९ जनाको हवाई उद्धार गरिएको हो ।

Watch On

त्यसैगरी त्रिशूली थ्री ए मा टनेल हेड फेला परेको र कम्प्रेसरबाट हावा दिने कार्य गरिएको र ३ वटा एक्स्काभेटर प्रयोग गरी पछाडितर्फ रहेको वैकल्पिक मार्ग करिब १५ मिटर खोलिएको पनि सैनिक जनसम्पर्क निर्देशनालयले जनाएको छ ।

त्यस्तै, त्रिशूली थ्री बी मा पनि विज्ञसहितको फौज खटिई एक्स्काभेटर समेत प्रयोग गरी खोज तथा उद्धार कार्य गरिरहेको सेनाले उल्लेख गरेको छ। विदेशीसहितको संयुक्त खोज तथा उद्धार टोलीले चिलिमे हाइड्रो टनेलको ३५ मिटर भित्रसम्म पुगी अगाडि सफा गर्ने काम पनि जारी रहेको पनि सेनाले जनाएको छ ।

सेनाका अनुसार अपर त्रिशूली १ मा विदेशीसहितको संयुक्त खोज तथा उद्धार टोलीले मैलुङमा २०० मिटर। र हाकुमा ३०० मिटरसम्म पुगी खोजी कार्य जारी राखेको छ ।

रसुवागढी हाइड्रोको टनेलमा भने करिब २५० मिटरसम्म पुग्दा टनेलको बन्द भाग फेला पारेपछि उद्धार टोली फर्केको छ ।

खोज उद्धारको संयुक्त उद्धार टोलीले लाङटाङ हाइड्रोको टनेलबाट एउटा शव फेला परेको छ । टनेलको करिब ६५ मिटर पर एउटा शव भेटिएको सेनाले जनाएको छ ।

खोजी तथा उद्धारका क्रममा नेपाली सेनाको टोलीले टिमुरे इलाकामा ५ वटा (नेपाली भाषाको अक्षर भएको ३ र चिनियाँ भाषाको अक्षर भएको २) वटा सेफ फेला पारी सशस्त्र प्रहरी बल नेपाललाई भरपाई गरी बुझाएको पनि सेनाले उल्लेख गरेको छ ।

रसुवाको टिमुरेदेखि नुवाकोट, धादिङ, चितवन र नवलपरासी पूर्वका प्रभावित क्षेत्रहरूमा नेपाली सेनाका ८ हजार ९ सय भन्दा बढी फौज प्रत्यक्ष रूपमा खटिई समन्वयात्मक रूपमा घाइतेहरूको खोज तथा उद्धार, शव व्यवस्थापनमा सहयोग, अवरुद्ध सडक सुचारु एवम् आपत्कालीन उपचार कार्य गरिरहेको सेनाले जनाएको छ।