हाइड्रोका टनेलमा उद्धार प्रगति के छ ?

काठमाडौँ । भोटेकोशी बाढीको सातौँ दिन आज पनि भोटेकोशी र त्रिशूली नदीका विभिन्न जलविद्युत् आयोजनाका सुरुङमा फसेकाहरुको खोजी जारी छ ।

Watch On

नेपाली सेनाका अनुसार चिलिमे हाइड्रोमा विदेशीसहितको संयुक्त खोज तथा उद्धार टोलीले टनेलभित्र प्रवेश गरी करिब ५० मिटर भित्रसम्म पुगेर खोजी गरिरहेको छ भने लाङटाङ हाइड्रोमा विदेशीसहितको संयुक्त खोज तथा उद्धार टोलीले टनेलभित्र करिब १५० मिटरसम्म प्रवेश गरी खोज तथा उद्धार कार्य गरिरहेको छ ।

त्यसैगरी अपर त्रिशूली–१ हाइड्रोमा विदेशीसहितको संयुक्त खोज तथा उद्धार टोली टनेलको करिब २०० मिटरसम्म प्रवेश गरेको छ । त्रिशूली थ्री ए मा टनेल हेड फेला परेको र कम्प्रेसरबाट हावा दिने र टनेलभित्रको पानी निकाल्ने कार्य भइरहेको सेनाले जनाएको छ । ३ वटा एक्स्काभेटर प्रयोग गरी पछाडितर्फ रहेको वैकल्पिक मार्ग करिब १५ मिटर खोलिएको छ। रक ब्रेकरबाट टनेल भित्र छिर्ने स्थान बनाउन ढुङ्गा फुटाउने कार्य भइरहेको पनि सेनाले जनाएको छ ।

त्रिशूली थ्री बीमा पनि विज्ञसहितको फौज खटिई टनेलमा प्रवेश गर्नका लागि प्रवेशद्वार पत्ता लगाई भित्र एक्स्काभेटर समेत प्रयोग गरी खन्ने कार्य भइरहेको छ।

 आज बिहान ११ बजेसम्म नेपाली सेनाद्वारा हवाई साधनमार्फत २३ जनाको उद्धार गरिएको सैनिक जनसम्पर्क निर्देशनालयले जनाएको छ।